प्रभू बैंककी सीबीओ रश्मी पन्त एकाएक गायब, सीआईबी पक्राउ गर्ने साइत कुर्दै

काठमाण्डौ । प्रभू बैंकको प्रमुख विजिनेश अफिसर(सीबीओ) रश्मी पन्त एक सातादेखि फरार रहेकी खुलेको छ ।  

प्रहरीको केन्द्रीय अनुसन्धान ब्यूरो(सीआईबी)ले बैंकका प्रमुख कार्यकारी अधिकृत अशोक शेरचन, नायव प्रमुख कार्यकारी अधिकृत मणिराम पोखरेल लगायत तीन उच्च पदस्थलाई साताअघि बबरमहल(बिजुलीबजार)स्थित मुख्य कार्यालयबाट पक्राउ गरेको थियो । 

सीआईबीले अपरेशन चलाउँदैछ भन्ने गोप्य सूचना पाएपछि आफन्तको विवाहको बहानामा सुनियोजित ढंगले अघिल्लो दिन नै कञ्चनपुर गएकी थिइन् ।  

त्यसपछि सीईओ, डिसीइओ पक्राउपछि उनी फरार रहेको खबरहरु प्रकाशित भए । ती खबर आएका दुई दिनसम्म चूप बसेकी उनले त्यसपछि भने विभिन्न मिडिया प्ल्याटफर्म प्रयोग गरी 'आफू नभागेको र आफू बैंकको कुनै प्रकरणमा सामेल नभएकोले सुनियोजित ढंगले चरित्रहत्या गरिएको' गुनासो गर्दै समाचार प्रकाशन गर्न लगाएकी थिइन् । उनले सो क्रममा विभिन्न मिडियाहरुमा कुराकानी गर्दै आफू बैंकको कुनै पनि प्रकरणमा संलग्न नभएको दाबी गर्दै 'बुधबारदेखि कार्यालयमा उपस्थित हुने' घोषणा समेत गरेकी थिइन् ।  

उनले सार्वजनिक सञ्चारमाध्यममा मात्र नभई बैंकका डिपार्टमेन्ट प्रमुख र ब्राञ्च म्यानेजर(बीएम)हरुलाई समेत एउटा मेल पठाएर 'बुधबारदेखि आफू नियमित रुपमा कार्यालयमा उपस्थित हुने' जानकारी गराएकी थिइन् । त्यो मेल बैंकको एचआरमा पनि पुगेको थियो ।  

पन्त बुधबारदेखि कार्यालयमा आउने खबर बैंककै कर्मचारीहरुले सीआईबीसम्म पुर्याएका थिए । सीआईबीले समेत उनी कार्यालयमा उपस्थित भएलगत्तै गिरफ्तार गर्ने गरी सादा पोशाकमा सुरक्षाकर्मीलाई प्रभू बैंकको मुख्यालय आसपास त्यसपछि लगातार(दैनिक) खटाउँदै आएको छ ।  

तर आफू नभागेको दाबी गर्ने र बुधबारदेखि कार्यालय आउँछु भनी स्टाफहरुलाई मेल गरेकी पन्त रहस्यमय ढंगले कञ्चनपुरबाटै गायब भएकी छिन् । उनी 'कार्यालयमा आउँछु' भन्दै सबैलाई झुक्याएर सीआईबीको कारबाहीबाट बच्न भारततर्फ लागेकी बैंकमा उनी निकट रहेका कर्मचारीहरुले दाबी गरेका छन् । तर, यसको स्वतन्त्र पुष्टि भने हुन सकेको छैन।  

'बुधबारदेखि कार्यालय आउँछु' भनेकी रश्मी सो दिन पूर्व जानकारी नदिई अनुपस्थित भएकी बैंकका एक सञ्चालकले पुष्टि गरे । बिहीबार सार्वजनिक विदा परेकोले बैंक बन्द रह्यो । कर्मचारी तथा सञ्चालकहरुले शुक्रबार पनि उनको बाटो हेरे, तर पन्त कार्यालय आइनन् ।  

शनिवार पुनः साप्ताहिक विदाका कारण बैंक बन्द रह्यो । त्यसपछि आइतबार(आज) समेत रश्मी कार्यालयमा नआएकी ती सञ्चालकले प्रष्ट पारे । 'मैले भर्खरै बुझेको थिएँ, आज पनि पन्त नआउनुभएको कुरा आयो ।' उनले बिजशालासँग भने-'सायद उहाँ आफूलाई पनि सीआईबीले पक्रिदैंछ भन्ने त्रासमा हुनुहुन्छ जस्तो लाग्यो । बिनाजानकारी यसरी गायब त नहुनुपर्ने हो । फेरि उहाँको गल्ती छैन भने यसरी किन भाग्नुभएको हो, हामी पनि अचम्भित छौं ।' 

पन्तसँग अरुबेला कुराकानी हुने मोवाइल लगातार स्वीच अफ गरिएको छ । मोवाइलको लोकेसनका आधारमा व्यक्ति रहेको क्षेत्र पत्ता लाग्ने र नेपालमा जहाँ भए पनि पक्राउ परिने डरले उनले मोवाइल लगातार स्वीच अफ गरिरहेकी छिन् ।  

बैंककै एक कर्मचारीले भने उनी मोवाइल स्वीच अफ गरेर भारततर्फ लागेकी र त्यहाँको एउटा अस्पतालमा कुनै बिरामीको बाहाना गरेर २ महिनासम्म उतै बस्ने योजना रहेको सुनिएको दाबी गरेका छन् । तर, यसको पनि स्वतन्त्र पुष्टि भइसकेको छैन।  

भगाइएको आशंका

यसैबीच, प्रहरीस्थित एक उच्च स्रोतले भने प्रभू बैंकका विभिन्न फाइलहरुको अनुसन्धान भइरहेका कारण ती अधिकांशमा रश्मीको समेत संलग्नता देखिएको र पक्राउ परिने डरले उनी भागेकी हुनसक्ने दाबी गरेको छ ।  

सीईओ र डिसीईओलाई छुटाउन, फेरि क्लिन चिट दिएर बैंकको नेतृत्वमा फर्काउने खेलमा बाहिरबाटै खेल्नसक्ने पात्र रश्मी भएकोले उनलाई योजना बनाएरै कार्यालयमा अनुपस्थित हुने छुट दिइएको हुनसक्ने समेत केही स्रोतहरुले आशंका गरेका छन् ।

बैंककै केही उच्च पदस्थहरुले भने अहिले सीआईबीको अपरेशनबाट जोगाएर सुनियोजित ढंगले रश्मीलाई नै बैंकको सीईओ बनाउने र उनी सीईओ भएपछि शेरचन नेतृत्वको बेला भएका गलत कामहरुको उचित व्यवस्थापन उनीबाट गराउने गरी योजना बनाइएको र यही योजनाअन्तरगत रश्मीलाई पक्राउ पर्नबाट जोगाउने काम भइरहेको दाबी गरेका छन् ।