थ्रीजी सेवा बन्द गर्दै एनसेल, ‘भोल्टे’ सेवाको फाइदा लिन आग्रह

काठमाण्डौ । नयाँ प्रविधि अपनाउने र सेवामा स्तरोन्नती गर्ने आफ्नो योजना अनुरुप एनसेलले कोशी प्रदेशका विभिन्न स्थानमा थ्रीजी सेवा बन्द गर्ने भएको छ । कम्पनीको यो कदम ‘भोइस ओभर लङ्ग टर्म एभोल्युसन’ (भोल्टे) प्रविधिसँगै फोरजी नेटवर्कलाई झन् बलियो बनाउँदै भविष्यको फाइभजी नेटवर्कका लागि आधार तयार गर्ने तर्फ लक्षित रहेको जनाइएको छ ।

देशैभर फोरजी नेटवर्क विस्तार भइरहेको अवस्थामा थ्रीजी नेटवर्क बन्द हुनुले अझ उन्नत प्रविधिको प्रयोगसँगै ग्राहकहरूलाई भ्वाइस अनि डेटामा झन् गुणस्तरीय कनेक्टिभिटीको अनुभूति गराउने कम्पनीले जनाएको छ । योसँगै थ्रीजीमा आधारित भोइस सेवाहरू अब फोरजीमा आधारित भोल्टेमा सारिनेछ ।

 

आफ्नो फोरजी नेटवर्क मार्फत एनसेलले देशैभर भोल्टे सेवा प्रयोगमा ल्याइसकेको छ । भोल्टे प्रविधिको लाभ उठाउन फोरजी चल्ने मोबाइल फोन, फोरजी सीमकार्ड वा इ–सिम अनि फोरजी नेटवर्क उपलब्ध स्थानको आवश्यकता पर्दछ । कुन कुन मोबाइल फोन ब्रान्ड अनि मोडलमा यो सेवाको उपभोग गर्न सकिन्छ अनि कसरी भोल्टे सेवा सक्रिय गर्न सकिन्छ लगायतका जानकारी एनसेलको वेबसाइट अनि एनसेल एप मार्फत प्राप्त गर्न सकिन्छ ।

भोल्टे मार्फत ग्राहकहरूले गुणस्तरीय भ्वाइस कलको मजा लिन सक्छन् । साथै एकै समयमा ग्राहकहरूले भ्वाइसका साथै मोबाइल ब्रोडब्याण्ड सेवा हालकै शुल्कमा प्रयोग गर्न सक्छन् । एनसेलको फोरजी कभरेज देशभर झन्डै ९५ प्रतिशत जनसंख्यामाझ पुगिसेकको छ र यही अनुसार भोल्टे सेवा उपलब्ध रहेको कम्पनीले जनाएको छ ।

एनसेलले गत वर्ष घोषणा गरिएअनुसारै देशभर चरणबद्ध रूपमा थ्रीजी सेवा बन्द गर्ने योजना कार्यान्वयन गर्ने बताएको छ । माघ २२ गते एनसेलले कोशी प्रदेशका झापा, धनकुटा र तेह्रथुम जिल्लाका विभिन्न स्थानिय तहहरूमा थ्रीजी सेवा बन्द गर्दैछ । कम्पनीले यी क्षेत्रमा बसोबास गर्ने ग्राहकहरूलाई एनसेलको भोल्टे सेवा लिनका लागि आग्रह गरेको छ ।

भोल्टे प्रविधिमा उच्च गुणस्तरको भ्वाइस कल सेवा हुन्छ भने र फोन सम्पर्क पनि तुलनात्मक रुपमा छिटो समयमा नै स्थापित हुन्छ ।  ग्राहकहरूले गुणस्तरीय भ्वाइस कल अनि फोरजी डेटा उही शुल्कमा प्रयोग गर्न सक्नेछन् । *१२३*११#  डायल गरी भोल्टे सेवा सक्रिय गर्न सकिन्छ। भोल्टे सक्रिय भएपछि ग्राहकहरुले आफ्नो मोबाइल फोनको भोल्टे सेटिङ्मा भोल्टे अन गर्नुपर्ने हुन्छ ।