सुरक्षित इन्टरनेट दिवस २०८२ः एनसेल फाउन्डेसनद्वारा ‘सेफर इन्टरनेट टुगेदर’ अभियान सुरु

काठमाण्डौ । सुरक्षित इन्टरनेट दिवस २०८२ को अवसरमा एनसेल फाउन्डेसन र नासा सेक्युरिटीजले देशव्यापी रूपमा ‘सेफर इन्टरनेट टुगेदर (एसआईटी)’ अभियान सुरु गरेका छन्। विद्यालय तहका विद्यार्थीलाई लक्षित गर्दै सुरु गरिएको यस अभियानमार्फत साइबर सुरक्षा, डेटा गोपनीयता र डिजिटल सुरक्षाबारे सचेतना फैलाउने उद्देश्य राखिएको छ।

नमुना परियोजनाका रूपमा सुरु गरिएको एसआईटी कार्यक्रम बागमती, गण्डकी र मधेस प्रदेशका सरकारी, सामुदायिक तथा निजी विद्यालयहरूमा कक्षा ३ देखि १२ सम्मका विद्यार्थीहरूका लागि सञ्चालन हुनेछ। यस क्रममा साइबर सचेतना सत्र र इन्टरनेट सुरक्षासम्बन्धी हाते पुस्तिका वितरण गरिनेछ। कार्यक्रमबाट ५० हजारभन्दा बढी विद्यार्थी, शिक्षक र समुदाय सदस्य लाभान्वित हुने अपेक्षा गरिएको छ।

कार्यक्रमको औपचारिक घोषणा पोखरास्थित श्री राष्ट्रिय माध्यमिक विद्यालयमा आयोजित सत्रमार्फत गरिएको हो। कार्यक्रममा एनसेलका प्रमुख कार्यकारी अधिकृत माइकल फोलेले डिजिटल सुरक्षा र कृत्रिम बौद्धिकताको जिम्मेवार प्रयोगबारे विद्यार्थीहरूलाई जानकारी गराए।

नासा सेक्युरिटीजका प्रबन्ध निर्देशक मदन पौड्यालले डिजिटल साक्षरता र साइबर जागरण आजको समयमा अत्यावश्यक भएको उल्लेख गर्दै यस सहकार्यले युवालाई सुरक्षित डिजिटल व्यवहारतर्फ प्रेरित गर्ने विश्वास व्यक्त गरे।

हालसम्म कास्की, ललितपुर र भक्तपुरका ९ विद्यालयमा एसआईटी सत्र सम्पन्न भइसकेका छन्, जसबाट ७ हजारभन्दा बढी विद्यार्थी लाभान्वित भएका छन्। कार्यक्रम कार्यान्वयन साझेदारका रूपमा एस्टेरिस्क टेक्नोलोजीले सहकार्य गरेको छ। पहिलो चरण सफल भएपछि अभियानलाई आगामी आर्थिक वर्षमा अन्य प्रदेशमा विस्तार गर्ने योजना छ।