बीमकको मुद्दती निक्षेपमा एयरमार्क सम्बन्धी मार्गदर्शन संशोधन, के फेरियो ?

काठमाण्डौ । नेपाल बीमा प्राधिकरणले बीमकको मुद्दती निक्षेपमा एयरमार्क सम्बन्धी मार्गदर्शन २०८१ संशोधन गरेको छ ।  

प्राधिकरणको माघ २७ गतेको सञ्चालक समितिको निर्णय बमोजिम उक्त मार्गदर्शनको परिच्छेद (५)को निर्देशन ९ (३) संशोधन गरेको हो ।  

जसबमोजिम बीमा कम्पनीले एयरमार्क सम्बन्धि प्रक्रियाका लागि मुद्दती निक्षेप खाता खोलिएको १५ कार्य दिनभित्र एयरमार्क प्रणालीमा ब्लक रिक्वेस्ट पेश गर्नुपर्नेछ र उक्त अवधिपश्चात पेश गरिएको कुनै पनि ब्लक रिक्वेस्ट उपर कारबाही अगाडी नबढाउने प्राधिकरणले जनाएको छ ।  

यसअघि बीमकले मुद्दती निक्षेप खाता खोलेको ७ दिनभित्र एयरमार्क प्रणालीमा ब्लक रिक्वेष्ट पेश गर्नुपर्ने प्रावधान थियो र उक्त अवधिपश्चात पेश गरेको कुनै पनि ब्लक रिक्वेष्ट उपर कारबाही अगाडी नबढाउने व्यवस्था थियो ।  

प्राधिकरणले बीमा कम्पनीहरुको लागि सहज नीति अपनाई मुद्दती निक्षेप खोल्दा एयरमार्क प्रणालीमा ब्लक रिक्वेष्ट पेश गनेुपर्ने समयसीमा बढाइदिएको हो ।   

यसका साथै बीमकले ब्लक रिक्वेष्ट गर्दा सम्बन्धित मुद्दती निक्षेपको नम्बर, मुद्दती निाक्षेपको सुरु मिति र मुद्दती निक्षेपको परिपक्वता मितिको प्रमाणीकरणका लागि निवेदन, मुद्दती निक्षेप रसिद, एकै मितिमा सुरु हुने मुद्दती निक्षेप खाताहरुको लागि एकल स्व–घोषणा पत्र र प्रस्तावित मुद्दती निक्षेपमा गरिएको लगानी प्राधिकरणबाट जारी लगानी निर्देशनमा तोकिएको सीमा भित्र रहेको भनी बीमकको वित्त प्रमुखद्वारा प्रमाणित स्व–घोषणा पत्र संलग्न गर्नुपर्ने व्यवस्था छ ।