एक वर्षमै १० करोड डलरले बढ्यो विनोद चौधरीको सम्पत्ति, फोर्ब्स सूचीको १९८२औँ स्थानमा परे

काठमाण्डौ । नेपालका एक मात्र डलर अर्बपति उद्योगपति विनोद चौधरीको सम्पत्ति एक वर्षको अवधिमा उल्लेखनीय रूपमा बढेको छ। विश्वप्रसिद्ध पत्रिका फोर्ब्सका अनुसार सन् २०२५ मा २ अर्ब डलर रहेको उनको कुल सम्पत्ति सन् २०२६ मा बढेर २.१ अर्ब डलर पुगेको छ। यसरी एक वर्षमै उनको सम्पत्ति १० करोड अमेरिकी डलरले वृद्धि भएको देखिन्छ।

फोर्ब्सको पछिल्लो विश्व अर्बपति सूचीअनुसार चौधरी सन् २०२६ का लागि १९८२औँ स्थानमा रहेका छन्। उनी फोर्ब्सको अर्बपति सूचीमा पर्ने नेपालका एक मात्र व्यक्ति हुन्।

चौधरीको सम्पत्ति पछिल्ला वर्षहरूमा क्रमशः बढ्दै गएको देखिन्छ। सन् २०२४ मा उनको नेटवर्थ १.८ अर्ब डलर रहेको थियो भने त्यसपछि सन् २०२५ मा २ अर्ब डलर पुगेको थियो। त्यसपछि २०२६ मा थप वृद्धि भएर २.१ अर्ब डलर पुगेको हो।

बहुआयामिक व्यापारिक समूह सीजी कर्प ग्लोबल (CG Corp Global) का अध्यक्ष चौधरीले खाद्य उद्योग, होटल, बैंकिङ, ऊर्जा, पूर्वाधार र रियल इस्टेट लगायतका क्षेत्रमा लगानी विस्तार गरेका छन्। विशेषगरी वाइवाइ चाउचाउ ब्रान्डमार्फत सुरु भएको व्यवसाय अहिले विश्वका धेरै देशमा फैलिएको छ।