पश्चिमी प्रणाली सक्रिय, काठमाडौंसहित देशभर बदली र वर्षा सम्भावना

काठमाण्डौं । देशभर आज पनि मौसमको अवस्था अस्थिर रहने जल तथा मौसम विज्ञान विभागले जनाएको छ ।  

विभागका अनुसार आकाश अधिकांश समय बदली रहनेछ भने विभिन्न स्थानमा मेघगर्जनसहित वर्षा पर्ने सम्भावना उच्च रहेको छ ।

दिउँसो हिमाली तथा पहाडी भू-भागमा सामान्यदेखि घना बदली रहनेछ भने तराई क्षेत्रमा आंशिक बदली रहने अनुमान गरिएको छ ।  

लुम्बिनी, कर्णाली र सुदूरपश्चिम प्रदेशसहित अन्य पहाडी तथा हिमाली क्षेत्रका केही स्थानमा मध्यम वर्षासँगै चट्याङ पर्न सक्ने तथा उच्च हिमाली भेगमा हिमपातसमेत हुन सक्ने विभागले जनाएको छ ।

तराईका केही स्थानमा हल्का वर्षा र मेघगर्जन हुने सम्भावना छ । 

काठमाडौं उपत्यकामा पनि दिउँसो हल्कादेखि मध्यम वर्षा हुन सक्ने पूर्वानुमान गरिएको छ ।  

दिनभर आकाश कहिले खुल्ने र कहिले बादल लाग्ने क्रम जारी रहनेछ ।

रातिको समयमा कोशी प्रदेशका केही स्थानमा मध्यम वर्षा हुन सक्नेछ भने मधेशसहित अन्य प्रदेशका पहाडी तथा हिमाली क्षेत्रमा हल्का वर्षा र हिमपातको सम्भावना रहेको विभागको भनाइ छ ।

हाल पश्चिमी न्यूनचापीय प्रणाली, स्थानीय वायु तथा पूर्वी भूभाग नजिकको न्यूनचापीय क्षेत्र सक्रिय रहेकाले देशभर मौसममा निरन्तर अस्थिरता देखिएको विभागले जनाएको छ ।