ट्रम्पको आलोचनापछि पनि फिफाद्वारा ब्राजिलियन रेफ्रीको बचाउ

काठमाण्डौ । विश्वकप फुटबलमा अमेरिकी स्ट्राइकर फोलारिन बालोगुनलाई रातो कार्ड देखाएको विषयमा विवाद बढेपछि फिफाले ब्राजिलियन रेफ्री राफायल क्लाउसप्रति पूर्ण समर्थन जनाएको छ। अमेरिकी राष्ट्रपति डोनाल्ड ट्रम्पले क्लाउसको निर्णयमाथि प्रश्न उठाउँदै उनको निष्पक्षतामाथि शंका व्यक्त गरेपछि फिफाले रेफ्रीको व्यावसायिकता र इमानदारीको बचाउ गरेको हो।

बालोगुनलाई बोस्निया एन्ड हर्जेगोभिनाविरुद्धको अन्तिम–३२ चरणको खेलमा भीएआर जाँचपछि क्लाउसले रातो कार्ड देखाएका थिए। अमेरिकी खेलाडीले विपक्षी खेलाडी तारिक मुहरेमोभिचको खुट्टाको गोलीगाँठोमा जुत्ताले प्रहार गरेको देखिएपछि उनलाई मैदानबाट बाहिर पठाइएको थियो।

त्यसपछि फिफाले बालोगुनमाथिको रातो कार्डसम्बन्धी प्रतिबन्ध स्थगित गर्दै उनलाई बेल्जियमविरुद्धको अन्तिम–१६ खेल खेल्न अनुमति दिएको थियो। उक्त निर्णयले विश्वकपको अनुशासन प्रणाली र निष्पक्षताबारे बहससमेत चर्काएको थियो।

ट्रम्पले क्लाउसको विगत हेर्दा उनी केही हदसम्म शंकास्पद देखिने बताएका थिए। यद्यपि उनले आफ्नो दाबीका लागि विस्तृत प्रमाण भने सार्वजनिक गरेका थिएनन्।

फिफाले भने क्लाउसलाई विश्वकै उत्कृष्ट रेफ्रीमध्ये एक भएको बताउँदै उनको उच्च व्यावसायिकता र इमानदारीमाथि पूर्ण विश्वास रहेको जनाएको छ। फिफाले जारी गरेको वक्तव्यमा क्लाउसलाई संस्थाको उत्कृष्ट रेफ्री समूह ‘टिम वन’ का महत्वपूर्ण सदस्यका रूपमा वर्णन गरिएको छ।

फिफा अध्यक्ष जियानी इन्फान्टिनोले रेफ्रीहरूको सम्मान गर्नुपर्नेमा जोड दिँदै फुटबलमा रेफ्रीको भूमिका अपरिहार्य रहेको बताएका छन्।

फिफाको रेफ्री समितिका अध्यक्ष पिएर्लुइगी कोलिनाले पनि ४६ वर्षीय क्लाउस अनुभवी र सम्मानित रेफ्री भएको उल्लेख गर्दै उनीमाथि संस्थाको पूर्ण विश्वास कायम रहेको बताए। क्लाउसले यसअघि सन् २०२२ को कतार विश्वकपमा पनि रेफ्रीको भूमिका निर्वाह गरिसकेका छन्।

विश्वकप अवधिभर रेफ्रीहरूले सञ्चारमाध्यमसँग प्रत्यक्ष प्रतिक्रिया नदिने फिफाको नीतिअनुसार क्लाउसले यस विषयमा कुनै टिप्पणी गरेका छैनन्।