एएफपीका पत्रकार ओझालाई एसियाली विकास बैंकको अन्तर्राष्ट्रिय अवार्ड

काठमाण्डौ । अन्तर्राष्ट्रिय समाचार एजेन्सी एएफपीका पत्रकार अनुप ओझालाई एसियाली विकास बैंंक इन्स्टिच्युट डेभलपिङ एसिया जर्नलिजम अवार्ड दिइने भएको छ ।

एसियाली विकास बैंकसँग सम्बद्ध एडीबीआई इन्स्टिच्युटले पत्रकार ओझालाई २ हजार अमेरिकी डलर बराबरको अवार्ड दिन लागेको घोषणा गरेको छ ।

एआईका माध्यमबाट विपद्को पूर्व चेतावनी सूचना सम्बन्धमा एएफपीका लागि ओझाले लेखेको समाचारका लागि यो अवार्ड दिइन लागेको विज्ञप्तिमा छ ।

१७ देशका ७९ जनामध्येबाट पाँच जनालाई यस्तो अवार्ड प्रदान गरिन लागिएको एसियाली विकास बैंक इन्स्टिच्युटले जनाएको छ । अनुसन्धाता र पत्रकार सहभागी निर्णायक मण्डलले अवार्डको मूल्यांकन गरेको हो ।

ओझालाई पहिरो सम्बन्धमा पूर्व सूचना दिन वर्षा र जमिनको तथ्यांकका आधारमा युनिभर्सिटी अफ मेलर्बनका प्राध्यापक एन्टोनिएट्ले नेपाल, बेलायत तथा इटलीका सहयोगीहरुको सहायतामा नेपालमा विकास गरेको प्रणालीबारे रिपोर्टिङका लागि निर्णायक मण्डलले पुरस्कृत गर्न लागेको इन्स्टिच्युटले जनाएको छ ।

यसमा त्रिभुवन विश्वविद्यालयका प्राध्यापक समेत संलग्न छन् । यस्तो प्रणालीका लागि उत्तरपश्चिम भेगका नागरिकले तथ्यांक उपलब्ध गराएको विषय रिपोर्टिङमा समावेश छ ।

पत्रकार ओझाले गुरु पूर्णिमाकै दिन अवार्ड प्राप्तिको खबर पछि आफू एकदमै सम्मानित महसुस भएको भन्दै आफ्नो पुरस्कार सबै शिक्षक, मेन्टर, साथी तथा सुभचिन्तकलाई समर्पित गरेको बताए ।

लामो समय काठमाडौं पोष्टमा सक्रिय पत्रकार ओझा केही वर्षयता अन्तर्राष्ट्रिय समाचार एजेन्सी एएफपीमा क्रियाशिल छन् । फिचर रिपोर्टिङमा दख्खल भएका तनहुँ व्यास नगरपालिका ८ बर्लाचीका ओझा मल्टिमिडिया रिपोर्टिङमा समेत सक्रिय छन् ।

पत्रकार ओझा गायन, अभिनय तथा संगीतका क्षेत्रमा समेत सक्रिय छन् ।