२० करोड घाटाबाट नाफामा फर्कियो जानकी फाइनान्स, इपीएस धनात्मक तर एनपीएल अझै नाजुक !

काठमाण्डौ । जानकी फाइनान्स कम्पनी नाफामा उक्लिएको छ । गत आर्थिक वर्ष २०८२/८३ मा कम्पनीले ९३ लाख ४३ हजार रुपैयाँ खुद नाफा कमाएको छ ।  

अघिल्लो आर्थिक वर्ष २०८१/८२ मा भने कम्पनीले २० करोड ७२ लाख ९४ हजार रुपैयाँ घाटा ब्यहोरेको थियो ।  

कम्पनीको खुद ब्याज आम्दानीमा आएको सुधारसँगै इम्पेयरमेन्ट चार्ज अर्थात् प्रोभिजनिङ शुल्क घट्दा नाफा वृद्धिमा टेवा पुगेको हो ।  

अघिल्लो आवमा १६ करोड ६७ लाख रुपैयाँ खुद ब्याज आम्दानी गरेको जानकीले गत आवमा भने १७ करोड १५ लाख रुपैयाँ ब्याज आम्दानी गरेको छ । यसर्थ कम्पनीको यस्तो आम्दानी २.८८ प्रतिशतले वृद्धि भएको छ ।  

त्यस्तै, कम्पनीको इम्पेयरमेन्ट चार्ज भने ७७.०४ प्रतिशतले घट्न पुगेको छ । अघिल्लो आवमा २ अर्ब १८ करोड १८ लाख रुपैयाँ इम्पेयरमेन्ट चार्ज तिरेको यस कम्पनीले गत आवमा भने ५० करोड १० लाख रुपैयाँ मात्रै इम्पेयरमेन्ट चार्ज छुट्याएको छ । यसकारण पनि कम्पनी नाफामा उक्लिएको हो ।  

६९ करोड ४ लाख रुपैयाँ चुक्तापूँजी रहेको यो कम्पनीले गत आवमा रिजर्भमा ४३ करोड ९ लाख रुपैयाँ संचित गरेको छ भने रिटेन्ड अर्निङ भने एक अर्ब १२ करोड ७५ लाख रुपैयाँ ऋणात्मक रहेको छ ।  

कम्पनीको खराब कर्जा अनुपात (एनपीएल) ४८.६१ प्रतिशतबाट बढेर ६१.५५ प्रतिशत पुगेको छ भने पूँजीकोष अनुपात ६.१४ प्रतिशत ऋणात्मक, कस्ट अफ फण्ड ६.८९ प्र िशत, सीडी रेसियो ९३.३९ प्रतिशत, स्प्रेड दर ४.६० प्रतिशत र बेस रेट ९.८० प्रतिशत पुगेको छ ।  

त्यस्तै, कम्पनीको प्रतिसेयर आम्दानी (इपीएस) ३०.०२ रुपैयाँ ऋणात्मक रहेकोमा सुधारिएर १.३५ रुपैयाँ धनात्मक भएको छ । त्यस्तै, नेटवर्थ ०.८९ रुपैयाँ ऋणात्मक, मूल्य आम्दानी अनुपात (पीई रेसियो) २८३.७ गुणा, तरलता अनुपात ३७.९४ प्रतिशत रहेको छ ।