सांग्रिला डेभलपमेन्ट बैंकको १०.५२६३ प्रतिशत लाभांश पारित, अध्यक्षमा उज्ज्वल सत्याल

काठमाडौं । सांग्रिला डेभलपमेन्ट बैंक लिमिटेडको २२औँ वार्षिक साधारणसभाले १०.५२६३ प्रतिशत लाभांश वितरण गर्ने प्रस्ताव पारित गरेको छ। सभाले आगामी चार वर्षका लागि छ सदस्यीय सञ्चालक समिति पनि निर्विरोध चयन गरेको छ।

असोज २२ गते बिहीबार काठमाडौंको गैरीधारास्थित एलिस रिसेप्सनमा सम्पन्न सभाले हाल कायम चुक्तापुँजीको ४ प्रतिशत बोनस सेयर र करसहित ६.५२६३ प्रतिशत नगद लाभांश वितरण गर्ने प्रस्ताव अनुमोदन गरेको हो।

बैंकको हाल कायम चुक्तापुँजी ३ अर्ब ७३ करोड ४० लाख ६८ हजार ५०५ रुपैयाँ ५३ पैसा छ। यसका आधारमा बैंकले १४ करोड ९३ लाख ६२ हजार ७४० रुपैयाँ २२ पैसाबराबरको बोनस सेयर र २४ करोड ३६ लाख ९७ हजार १०२ रुपैयाँ ४७ पैसाबराबरको नगद लाभांश वितरण गर्नेछ।

बोनस सेयर वितरणपछि बैंकको चुक्तापुँजी ३ अर्ब ८८ करोड ३४ लाख ३१ हजार २४५ रुपैयाँ ७५ पैसा पुग्नेछ।

साधारणसभाबाट संस्थापक सेयरधनीका तर्फबाट उज्ज्वल सत्याल, सुशीलकाजी बानियाँ र श्यामकुमार शर्मा तथा सर्वसाधारण सेयरधनीका तर्फबाट विष्णुप्रसाद ढकाल, कृष्णप्रसाद रेग्मी र भावना अग्रवाल सञ्चालकमा निर्विरोध चयन भएका छन्।

नवनिर्वाचित सञ्चालक समितिको बिहीबार नै बसेको बैठकले उज्ज्वल सत्याललाई अध्यक्ष चयन गरेको बैंकले जनाएको छ।

सभाले आर्थिक वर्ष २०८२/८३ को वित्तीय विवरण, लेखापरीक्षक नियुक्ति, प्रबन्धपत्र संशोधन तथा मर्जर र प्राप्तिलगायतका प्रस्ताव पनि पारित गरेको छ।

बैंकले हाल देशभर १०९ शाखा कार्यालय र ३० एटीएममार्फत सेवा दिइरहेको छ। संस्थागत सुशासन, जोखिम व्यवस्थापन र आन्तरिक नियन्त्रण प्रणालीलाई प्रभावकारी बनाउँदै आगामी दिनमा सेवा थप विस्तार गर्ने प्रतिबद्धता बैंकले व्यक्त गरेको छ।