तिहारका लागि राष्ट्र बैंकले आजदेखि सुनको असर्फी र चाँदीका सिक्का बेच्दै

काठमाडौं। नेपाल राष्ट्र बैंकले तिहारलाई लक्षित गर्दै आजदेखि दुई दिनसम्म सुनको असर्फी र चाँदीका सिक्का बिक्री गर्ने भएको छ ।

बबरमहलस्थित टक्सार महाशाखाबाट बिहान ११ बजेदेखि दिउँसो ३ बजेसम्म सिक्का बिक्री गरिने राष्ट्र बैंकका कार्यकारी निर्देशक अनुज दाहालले जानकारी दिए ।

यस वर्ष वाणिज्य बैंकहरूबाट ३५ किलो सुन खरिद गरी असर्फी तयार पारिएको छ । एक व्यक्तिले २.५ ग्रामको एउटा सुनको असर्फी र १० ग्राम तौलका बढीमा तीनवटा चाँदीका सिक्का खरिद गर्न सक्नेछन् । चाँदीका सिक्कामा लक्ष्मी, गजलक्ष्मी र गणेशको आकृति अंकित हुनेछ ।

सुन तथा चाँदीको असर्फी र सिक्काको मूल्य बिक्री हुने दिनको बजार मूल्यका आधारमा निर्धारण हुनेछ । उत्पादन लागतसमेत जोडिने भएकाले बजार मूल्यभन्दा केही महँगो पर्ने राष्ट्र बैंकले जनाएको छ ।

सिक्का खरिद गर्न नेपाली नागरिकता, राष्ट्रिय परिचयपत्र वा नम्बर खुलेको अन्य प्रमाणपत्रको प्रतिलिपिसहित स्वयं उपस्थित हुनुपर्नेछ । भुक्तानी नगद वा क्यूआरमार्फत गर्न सकिनेछ ।