राष्ट्रबैंकको यो सर्कुलरले लघुवित्तको नाफा बढ्ने

काठमाण्डौ । लघुवित्त वित्तीय संस्थाहरुको खराब कर्जा अनुपात घट्ने र नाफा बढ्ने निश्चित भएको छ ।  

नेपाल राष्ट्रबैंकले मौद्रिक नीतिमार्फत गरेको घोषणालाई कार्यान्वयनमा ल्याउँदै घ वर्गमा पर्ने लघुवित्त वित्तीय संस्थाहरुका लागि बुधबार साँझ एक सर्कुलर जारी गरी खराब कर्जा अनुपात घट्ने र नाफा बढ्ने खालको नीतिगत व्यवस्था गरेको हो । 

लघुवित्त वित्तीय संस्थाहरुले यसअघि असल कर्जाका लागि समेत १.३ प्रतिशत कर्जा नोक्सानीको व्यवस्था गर्दै आएका थिए । केन्द्रीय बैंकले यस्तो व्यवस्थालाई परिमार्जन गरी १.१ प्रतिशतमा सीमित गरिदिएको हो ।  

यो व्यवस्थाले प्रभिजन गर्नुपर्ने रकम घट्न गई लघुवित्त वित्तीय संस्थाहरुको नाफा बढ्ने देखिन्छ ।  

यस्तै, असल कर्जामा हुने प्रभिजन घटाउँदा यसको प्रभाव खराब कर्जा अनुपात घटाउनमा समेत देखिनेछ ।  

राष्ट्रबैंकले सुक्ष्म निगरानीमा परेका कर्जाका लागि न्यूनतम कर्जा नोक्सानी ५ प्रतिशत हुनुपर्ने पुरानै व्यवस्थालाई निरन्तरता समेत दिएको छ ।  

कमसल वर्गका कर्जाका लागि २५ प्रतिशत, शंकास्पदका लागि ५० प्रतिशत र खराब कर्जाको हकमा सतप्रतिशत कर्जा नोक्सानी व्यवस्था गर्नुपर्ने व्यवस्थाले समेत निरन्तरता पाएको छ।