अघिल्लो आवसम्म घाटामा रहेको रिभर फल्स ६.१६ करोड नाफा कमाउन सफल, यस्तो छ समग्र वित्तीय अवस्था

Capital Market
मंगलवार, भाद्र ११,२०८१ 08:33:14

काठमाण्डौ । रिभर फल्स पावर लिमिटेडले गत आर्थिक वर्ष २०८०/८१ को चौथो त्रैमाससम्मको अपरिष्कृत वित्तीय विवरण सार्वजनिक गरेको छ । जसअनुसार कम्पनी ६ करोड १६ लाख रुपैयाँ नाफा आर्जन गर्न सफल भएको छ । गत आवको सोही अवधिसम्म भने कम्पनी १ करोड ७ लाख रुपैयाँ घाटामा थियो ।

कम्पनीले विद्युत बिक्रीमातर्फत १८ करोड ३४ लाख रुपैयाँ आर्जन गरेको छ । यस्तै कम्पनीले यो अवधिसम्म १४ करोड ६५ लाख रुपैयाँबराबरको अन्य आम्दानी गरेको छ ।

यो अवधिसम्म कम्पनीको प्रशासनिक तथा सञ्चालन खर्च १ करोड ५६ लाख,वित्तीय खर्च १८ करोड ४४ लाख,ह्रासकट्टी खर्च ५ करोड ४३ लाख र प्रत्यक्ष खर्च १ करोड २९ लाख रुपैयाँ रहेको छ ।

अघिल्लो आवको चौथो त्रैमाससम्म ६ करोड १५ लाख रुपैयाँले घाटामा रहेको कम्पनीको रिजर्भको आकार भने ९ लाख ९४ हजार रुपैयाँले धनात्मक अवस्थामा पुगेको छ । ७० करोड रुपैयाँ चुक्तापूँजी भएको कम्पनीको कुल चालु सम्पत्ति १४ करोड ५ लाख रुपैयाँ र कुल चालु दायित्व २६ करोड ८५ लाख रुपैयाँ रहेको छ ।

कम्पनीको प्रतिसेयर आम्दानी(ईपीएस)८.८२ रुपैयाँ ,प्रतिसेयर नेटवर्थ १००.१४ रुपैयाँ,प्रतिसेयर कुल सम्पत्तिको मूल्य ३७४.३१ रुपैयाँ, मूल्य आम्दानी अनुपात ४१.८७ गुणा र तरलता अनुपात ०.५२ प्रतिशत कायम भएको छ ।