एनआईशी एशिया बैंकले कात्तिकका लागि पनि घटायो मुद्दती निक्षेपको ब्याजदर

काठमाण्डौ । एनआईसी एशिया बैंकले कात्तिक महिनाका लागि नयाँ ब्याजदर सार्वजनिक गरेको छ । जसअनुसार बैंकले व्यक्तिगत र संस्थागत मुद्दती निक्षेपको ब्याजदर घटाएको छ ।  

बैंकले व्यक्तिगत मुद्दती निक्षेपको अधिकतम ब्याजदर ६.९९ प्रतिशत कायम गरेको छ । असोज महिनाका लागि भने बैंकले व्यक्तिगत मुद्दती निक्षेपतर्फ अधिकतम ७.१८ प्रतिशत ब्याजदर दिएको थियो ।  

बैंकले कात्तिक महिनाका लागि व्यक्तिगत निक्षेपतर्फ ३ महिना अवधिका लागि ३.५० प्रतिशत ३ महिनादेखि १ वर्ष तलका लागि ४ प्रतिशत,१ वर्षका लागि ४.१५ प्रतिशत,१ वर्षदेखि २ वर्षसम्मका लागि ४.१५ प्रतिशत,२ वर्षमाथि देखि ५ वर्षसम्मका लागि ४.७५ प्रतिशत र ५ भन्दा माथिका लागि ६.९९ प्रतिशत ब्याजदरको व्यवस्था गरेको छ ।  

त्यस्तै बैंकले संस्थागत मुद्दती निक्षेपको ब्याजदर पनि घटाएको छ । असोज महिनामा संस्थागत निक्षेपकर्तालाई अधिकतम ६.१८ प्रतिशत ब्याजदर प्रदान गरेको बैंकले कात्तिक महिनाका लागि भने अधिकतम ५.९९ प्रतिशत प्रदान गर्ने भएको छ ।  

बैंकले संस्थागत मुद्दती निक्षेपको ६ महिनादेखि २ वर्षसम्मका लागि ३ प्रतिशत, २ वर्ष माथिदेखि ५ वर्षसम्मका लागि ३.५० प्रतिशत र ५ वर्षभन्दा माथिका लागि ५.९९ प्रतिशत ब्याजदरको व्यवस्था गरेको छ ।  

बैंकले असोज महिनाका लागि पनि ब्याजदर घटाएको थियो ।