धनात्मक बन्यो उपकार लघुवित्तको खुद नाफा, कुन–कुन सूचकमा भयो सुधार ?

काठमाण्डौ । उपकार लघुवित्त वित्तीय संस्था लिमिटेडको खुद नाफा धनात्मक बनेको छ । संस्थाले आज जारी गरेको चालु आवको पहिलो त्रैमासको वित्तीय विवरणअनुसार संस्थाको खुद ब्याज आम्दानी बढ्दा र खर्च कटौती हुँदा नाफा धनात्मक बन्न पुगेको हो ।  

समीक्षा अवधिसम्म संस्थाले २७ लाख ७९ हजार रुपैयाँ खुद नाफा आर्जन गरेको छ । अघिल्लो आवको सोही अवधिसम्म भने संस्थाले ३ करोड ३७ लाख रुपैयाँ खुद घाटा व्यहोरेको थियो ।  

संस्थाको ख्ुद ब्याज आम्दानी ४७.७८ प्रतिशतले बढेर २ करोड ५९ लाख रुपैयाँ पुगेको छ । संस्थाको अन्य सञ्चालन आम्दानी पनि २६ लाखबाट बढेर ४८ लाख ३५ हजार रुपैयाँ पुगेको छ ।  

संस्थाको कर्मचारी खर्च २ करोड ७६ लाखबाट घटेर २ करोड २३ लाख र अन्य सञ्चालन खर्च ३९ लाख ५३ हजारबाट घटेर ३७ लाख ३७ हजार रुपैयाँमा सीमित बनेको छ । संस्थाले सम्भावित घाटाका लागि ६६ लाख रुपैयाँको व्यवस्था गरेको छ । जबकी संस्थाले अघिल्लो आवमा यसका लागि २ करोड ५७ लाख रुपैयाँको व्यवस्था गरेको थियो ।  

यो अवधिमा संस्थाको रिजर्भको आकार १० करोड ६१ लाख रुपैयाँबराबर रहेको छ ।  

पहिलो त्र्रमाससम्म १ अर्ब २२ करोड रुपैयाँबराबरको निक्षेप संकलन गरेको संस्थाले २ अर्ब ४३ करोड रुपैयाँबराबरको कर्जा प्रवाह गरेको छ । संस्थाको खराब कर्जा अनुपातमा उल्लेख्य कमी आएको छ । अघिल्लो आवको पहिलो त्रैमाससम्म ४.८३ प्रतिशत रहेको खराब कर्जा अनुपात घटेर १.२५ प्रतिशतमा खुम्चिएको छ ।  

समीक्षा अवधिसम्म संस्थाको प्रतिसेयर आम्दानी ४.१६ रुपैयाँ, प्रतिसेयर नेटवर्थ २३७.४३ रुपैयाँ, प्रतिसेयर कुल सम्पत्तिको मूल्य २ हजार ४८२.७७ रुपैयाँ, मूल्य आम्दानी अनुपात ७७३.८३ गुणा र तरलता अनुपात २०.५५ प्रतिशत कायम भएको छ ।