सरकार ढल्ने हल्ला फेरि निस्तेज, कांंग्रेसले भन्यो-'गठबन्धनमा समस्या छैन, पूरा समय टिक्छ'

काठमाण्डौ । गठबन्धन सरकार ढल्ने चौतर्फी हल्लालाई चिर्दै संघीय संसदको सबैभन्दा ठूलो दल नेपाली कांग्रेसले फेरि एकपल्ट आफ्नो पोजिसन स्पष्ट पारेको छ ।  

आज बिहान कांग्रेस सभापति शेरबहादुर देउवाको बुढानिलकण्ठस्थित निवासमा डाकिएका पार्टीबाट सरकारमा सहभागी मन्त्रीहरुसँग ब्रिफिङ लिएपछि नेताहरुले गठबन्धन तलमाथि हुने अवस्था नरहेको र सरकारले हालै ल्याएका ५ अध्यादेशको विषय सल्लाह भएरै आएको प्रष्ट पारेका हुन् । 

सभापति देउवा निवासमा आयोजित छलफलमा सहभागी महामन्त्री गगनकुमार थापाले सरकारले ल्याएको अध्यादेश कांग्रेससँग छलफल गरेर आएको विषय प्रष्ट्याएका युवा तथा खेलकुद मन्त्री तेजुलाल चौधरीले जानकारी दिए । थापाको भनाई उद्धृत गर्दै उनले भने-'‘सरकारले ल्याएको अध्यादेश हामीसँग छलफल भएरै आएको हो । यसमा चर्चा परिचर्चा गर्न आवश्यक छैन ।’

कांग्रेस सभापति देउवा र महामन्त्री गगन थापाले विरोधीहरुले सरकार ढाल्न, नागरिकहरुको गठबन्धन सरकारप्रतिको विश्वासलाई कमजोर बनाउन र वातावरण धुमिल पार्न अनेकन आधारहीन हल्लाहरु फैलाएका भन्दै त्यसको सामना गरेर जनप्रिय काम गर्न मन्त्रीहरुलाई निर्देशन दिएका थिए ।  

शीर्ष नेताहरुबाट गठबन्धन बाहिर हल्ला गरिएजस्तो केही हुँदैन । गठबन्धन सरकार सहमतिअनुसारको पूरा अवधिभर नै जान्छ भन्ने कुरामा पुनः ढुक्क बनाउनुभयो । बैठकमा सहभागी एक राज्यमन्त्रीले भनेका छन् -' गठबन्धन भत्काएर तत्काल सरकार ढाल्ने वा ढलिहाल्छ भनेर पर्खिएर बसेकाहरुका लागि यो दुःखद खबर होला । तर, सरकार लामै समय टिक्छ भन्ने विषय आम सर्वसाधारणका लागि भने उत्साहको विषय हो । गठबन्धन लामै समय जाने देखियो ।'  

सो क्रममा सभापति देउवासँग केही मन्त्रीहरुले भने सोंचेजस्तो काम गर्न नसकिएको गुनासो गरेका थिए । प्रत्येक मन्त्रीले आफ्नो मन्त्रालयको प्रगतिविवरण सुनाउँदै कतिपय अवस्थामा बजेट पर्याप्त नहुँदाको पीडा भोग्नुपरेको गुनासो समेत पोखेका थिए ।

अर्थमन्त्री विष्णुप्रसाद पौडेल कृषि लगायतका मन्त्रालयहरुलाई बजेट भनेजति विनियोजन गर्ने विषयमा अनुदार देखिएका गुनासा समेत कतिपय मन्त्रीले छलफलका क्रममा गरेका थिए । 

मन्त्रीहरूले काम गर्ने जुन सोंचका साथ अघि बढे पनि अझै पनि यसमा समस्या रहेको ब्रिफिङ गरेका थिए । ओली नेतृत्वको सरकारमै बसेर पनि कसरी राम्रो काम गर्ने भन्ने विषयमा शीर्ष नेताहरुले पार्टीबाट मन्त्री बनेकाहरुलाई सुझाएका थिए ।  

केहीले प्रधानमन्त्री ओलीले आफूहरुले काम गर्दा अप्ठ्यारो पर्ने खालको असहयोग नगरेको समेत प्रष्ट पारेका थिए । कतिपय समयमा भने कहीँ न कहीँ समस्या देखिरहेकामा त्यसलाई शीर्ष नेताहरुले बसेर समाधान गर्नुपर्नेमा कतिपयले जोड दिएका थिए।