पुस मसान्तसम्म २५ अर्बबराबरको प्रत्यक्ष वैदेशिक लगानीको प्रतिबद्धता

काठमाण्डौ । चालु आर्थिक वर्ष को पुस मसान्तसम्ममा नेपालमा २५ अर्ब ७७ करोड ६४ लाख रुपैयाँबराबरको प्रत्यक्ष वैदेशिक लगानीको प्रतिबद्धता आएको छ। लगानीको यो प्रतिबद्धता ‘अटोमेटिक रुट’ र ‘अप्रुभल रुट’ बाट प्राप्त भएको उद्योग विभागले जनाएको छ ।

विभागका अनुसार चालु आवको पहिलो ६ महिनामा कुल ३५४ उद्योग दर्ता भएका छन् । जसमध्ये अटोमेटिक रुटबाट २ अर्ब ३८ करोड रुपैयाँ र अप्रुभल रुटबाट २३ अर्ब ३९ करोड रुपैयाँबराबर लगानी प्रतिबद्धता आएको विभागले जनाएको छ ।

विभागका अनुसार ६ हजार ७५३ वटा उद्योग स्वीकृतीका लागि दर्ता भएका छन् । जसमध्ये ३४५ साना उद्योग, ५ सय मझौला र ४ सय ठूला उद्योग रहेका छन् । क्षेत्रगत रुपमा हेर्दा सबैभन्दा धेरै पर्यटनसँग सम्बन्धित उद्योग रहेका छन् । पर्यटनसँग सम्बन्धित कुल १५७ उद्योग दर्ता भएका छन् ।