पुनर्बीमा कम्पनीहरुको विभिन्न क्षेत्रमा रु.४०.६३ अर्ब लगानी, नेपाल रि भन्दा हिमालयन रि आक्रामक

काठमाण्डौ । दुई पुनर्बीमा कम्पनीले विभिन्न क्षेत्रमा साढे ४० अर्ब रुपैयाँ लगानी गरेका छन् । नेपाल बीमा प्राधिकरणका अनुसार यी दुई पुनर्बीमकले चालु आवको दोस्रो त्रैमाससम्म विभिन्न क्षेत्रमा ४० अर्ब ६३ करोड ६२ लाख रुपैयाँ लगानी गरेका हुन् ।  

यो लगानी रकम गत आवको सोही अवधिसम्मको तुलनामा १३.७० प्रतिशत बढी हो । गत आवको दोस्रो त्रैमाससम्म नेपाल पुनर्बीमा कम्पनी र हिमालयन रि इन्स्योरेन्सले विभिन्न क्षेत्रम ३५ अर्ब ७४ करोड १० लाख रुपैयाँ लगानी गरेका थिए ।

दोस्रो त्रैमाससम्म आइपुग्दा सरकारी स्वामित्वमा रहेको नेपाल पुनर्बीमा कम्पनी भन्दा प्राइभेट कम्पनी हिमालयन रि को लगानी आक्रामक देखिएको छ ।  

नेपाल रि इन्स्योरेन्सको लगानी ३.३४ प्रतिशतले मात्रै बृद्धि भएको छ भने हिमालयन रि को २७.५० प्रतिशतले बृद्धि भएको छ । यी दुई कम्पनीले ९ वटा क्षेत्रमा लगानी गरेका छन् । नेपाल बीमा प्राधिकरणले बीमा कम्पनीहरुलाई लगानी विविधकरण गर्न निर्देशन दिएपनि दुई पुनर्बीमा कम्पनीले भने लगानी विविधिकरणमा जोड दिन सकेका छैनन् ।  

नेपाल रि र हिमालयन रि ले कुल लगानीको ७७.७४ प्रतिशत रकम बैंक तथा वित्तीय संस्थाको मुद्दती निक्षेपमा मात्रै लगानी गरेका छन् । दोस्रो त्रैमाससम्म दुई पुनर्बीमा कम्पनीले ३१ अर्ब ५९ करोड ४४ लाख रुपैयाँ मुद्दती निक्षेपमा राखेका छन् । यो रकम गत आवको सोही अवधिसम्मको तुलनामा ३.८१ प्रतिशत बढी हो । गत आवको सोही अवधिसम्म उक्त कम्पनीहरुको यो क्षेत्रमा ३० अर्ब ४३ करोड ३६ लाख रुपैयाँ लगानी रहेको थियो ।  

नेपाल बीमा प्राधिकरणको लगानी निर्देशिका बमोजिम पुनर्बीमा कम्पनीहरुले ‘क’ वर्गको बैंक र पूर्वाधार बैंकको मुद्दती निक्षेपमा कुल लगानीको ३० प्रतिशत रकम लगानी गर्न पाउने व्यवस्था छ भने ‘ख’ वर्गको बैंकमा १० प्रतिशत र ‘ग’ वर्गको वित्तीय संस्थामा ५ प्रतिशत रकम लगानी गर्न पाउने व्यवस्था छ ।  

त्यस्तै, कुल लगानी रकमको २० प्रतिशत रकम लगानी गर्न पाउने राष्ट्र बैंकको बचतपत्र वा ऋणपत्रमा भने नेपाल पुनर्बीमा कम्पनीको मात्रै लगानी रहेको छ । दोस्रो त्रैमाससम्म नेपाल रि ले यो क्षेत्रमा ३० करोड रुपैयाँ लगानी गरेको छ ।  

त्यस्तै, सूचीकृत पब्लिक कम्पनीको सेयरमा भने यी दुई कम्पनीको ३ अर्ब १० करोड रुपैयाँ लगानी रहेको छ । यो रकम गत आवको तुलनामा २११.३२ प्रतिशत बढी हो । गत आवको सोही अवधिसम्म नेपाल रि र हिमालयन रि को सेयरबजारमा ९९ करोड ६१ लाख रुपैयाँ मात्रै लगानी रहेको थियो ।  

बीमा कम्पनीहरुले कुल लगानीको १० प्रतिशत रकम सेयरबजारमा लगानी गर्न पाउने व्यवस्था छ । नेपाल बीमा प्राधिकरणले यस्तो क्षेत्रको लगानीमा थप लचकता अपनाउँदै लगानी निर्देशिका संशोधन गरेको छ । संशोधित लगानी निर्देशिका बमोजिम बीमा कम्पनीहरुले सूचीकृत पब्लिक कम्पनीको कायम चुक्तापुँजीको १५ प्रतिशतसम्म बीमा कम्पनीले लगानी गर्न पाउने व्यवस्था गरिदिएको छ । यसअघि बीमा कम्पनीले कायम चुक्तापुँजीको जम्मा ५ प्रतिशतसम्म मात्रै लगानी गर्न पाउने व्यवस्था थियो ।  

लगानीको सीमा बढेसँगै हिमालयन रि इन्स्योरेन्सले सेयरबजारमा गरेको लगानी ६३८.२६ प्रतिशतले बढाएको छ भने हिमालयन रि को यस्तो लगानी ८३.९२ प्रतिशत खुम्चिएको छ ।