ब्रोकर हाउसमा देखिन थाल्यो रौनक, लगानीकर्ता भन्छन् ‘श्रीमती झै पालेको बैंकले चुर्लुम्मै डुबायो’

काठमाण्डौ । सधैंको साता जस्तै आज पनि हामीले नियमित स्तम्भ ग्राउण्ड जिरोलाई निरन्तरता दिएका छौं । आज हामीले अनामनगर आसपासका केही ब्रोकर हाउसहरुमा पुगेर लगानीकर्ताहरुको बिचार सुन्ने र बुझ्ने प्रयास गरेका छौं । आज दिनभर सामान्य अंकले तल–माथि गरेको बजार अन्त्यमा बढेर बन्द भएको थियो । ब्रोकर हाउसहरुमा लगानीकर्ता भने बजारको अवस्था के हुने भन्नेमा अन्यौलता नै देखिन्थ्यो ।  

आज हामीले सबै भन्दा पहिले अनामनगरमा रहेको कालिका सेक्यूरिटिज (स्टक ब्रोकर नम्बर ४८) बाट हाम्रो स्तम्भको सुरुवात गरेका थियौं । यस ब्रोकरमा आज बिहानैदेखि लगानीकर्ताहरुको रौनक देखिन्थ्यो । यतिकैमा एक लगानीकर्ता रातो ज्याकेट लगाएर टाउकोमा चस्मा अडाउदै नमस्कार है, साथिहरु भन्दै ब्रोकर हाउस छिरे । ब्रोकर हाउसमा पहिले नै बसेका लगानीकर्ताले नमस्कार फर्काउँदै भने, ‘लौ ! ठूला खेलाडी आए अब बजारमा केही हुने भयो ।’ उनको जवाफ फर्काउदै पहिलेका लगानीकर्ताले भने, ‘के ठूलो खेलाडी भन्नुहुन्छ ? बैंकमा चुर्लुम्मै डुबिएको छ । खै ! यो श्रीमति पाल्दा झै पालेको बैंकले चुर्लुम्मै डुबायो । कहिले उभो लगाउने हो थाहा छैन । न सेयरको भाउ बढ्छ न त कम्पनीको प्रतिफल नै राम्रो छ ? यो पटक २ वटा बैंकले बाहेक कुनैले पनि राम्रो प्रतिफल नै दिएनन् । उनीसँगै बसेका एक लगानीकर्ताले जवाफ दिँदै भने, ‘धैर्य गर्नुहोस एक दिन पालो आउछ ।’  

सँगै बसेका एक लगानीकर्ताले भने, ‘यो बजारमा केहीले हावामा कमाए केहीले हावामै गुमाए । हामी त बैंकमा सति गयौं । हाईड्रोमा आएको भए पनि हुने रहेछ ।’ ब्रोकर हाउसमा यस्तै गल्फति चल्दै थियो । भित्ताको घडिमा १२ बज्दै थियो । आज पहिलो प्रहरमा नै करिब ३ अर्ब कारोबार भएको थियो ।  

यतिकैमा एक लगानीकर्ताले भने, ‘लौ आज ९ अर्ब माथिको कारोबार हुने भयो । बजारमा बिस्तारै रौनक थपिदै थियो । यहाँबाट हामी नजिकै रहेको इम्पेरियल सेक्यूरिटिज (स्टक ब्रोकर नम्बर ४५) मा पुग्यौं । यहाँ पनि लगानीकर्ताहरुको उपस्थिति राम्रै थियो । यहाँ भेटिएका लगानीकर्ताले पनि बैंकको सेयरले नै बजारमा घाटामा पुर्याएको तर्क गरे । निराश हुँदै एक लगानीकर्ताले भने, ‘हाम्रो सेयर बढ्दैनन्, साथिहरु हामीले गरि नखाने भईयो बजारमा ।’ उनीसँगै बसेका एक लगानीकर्ताले भने, ‘यो बजारमा यस्तै हो । एउटा कम्पनीमा कमायो अर्कोमा जान्छ । यो बजार यस्तै हो । अरुले कमाएको देखिन्छ । अन्तिममा बैंकलाई ब्याज तिर्यो बस्यो ।’  

यस बेलासम्म दिनको १ बजिसकेको थियो । बजारले बिस्तारै गति लिँदै थियो । यहाँबाट हामी नजिकै रहेको भोले गणेष सेक्यूरिटिज (स्टक ब्रोकर नम्बर ६१) मा पुग्यौं । यहाँ केही महिला लगानीकर्ता कम्प्यूटर लिएर कारोबारमा मस्त देखिन्थे । यस ब्रोकरमा भेटिएका लगानीकर्ताले निकै तल्लो विन्दुमा आएको कारण आफूहरुले कुमारी बैंक , एनआइसी एशिया जस्ता बैंकको सेयर किनेको चर्चा गर्दै थिए । यसै ब्रोकरमा भेटिएका केही लगानीकर्ता भने आज फाइनान्स समूह राम्रो बढेको र निस्कने समय भएको पनि तर्क गरे । ब्रोकर हाउसमा यस्तै गफगाफ चल्दै थिए ।  

यहाँबाट हामी राजधानीमा नै रहेको हिमालयन ब्रोकेज (स्टक ब्रोकर नम्बर ६३) मा पुग्यौं । यहाँ पनि लगानीकर्ताहरुको राम्रै उपस्थिति थियो । यस बेलासम्म दिनको २ बज्दै थियो भने बजारले पनि बिस्तारै माथिको गति लिदै थियो । यस ब्रोकरमा भेटिएका केही लगानीकर्ताले मौद्रिक नीतिको समीक्षाको चर्चा गरेको पनि सुनियो ।  

यस ब्रोकरमा भेटिएका एक लगानीकर्ताले समीक्षामा माइक्रोफाइनान्समा केही लचक नीति आउन सक्ने आँकलन गरे । केही लगानीकर्ताले भने, ‘अझै पनि बजारमा लो क्याप खेलाडिले चलाएका सिएचडिसी ,बुद्धभूमि जलविद्युत , तेह्रथुम पावर जस्ता कम्पनी नै बजारमा चल्ने चर्चा गरेको पनि सुनियो । आज २ बजेपछि बजारले बिस्तारै गति लिएको थियो भने ब्रोकरहाउसहरुमा पनि रौनक बढेको देखिन्थ्यो । आज हामी पुगेका बिभिन्न ब्राकर हाउसहरुमा पुग्दा बजारमा फेरि एकपटक रौनक फर्किन लागेको छनक पनि देखिन्थ्यो ।