कच्चा तेलको मूल्य बढ्यो, प्रतिब्यारेल कति पुग्यो भाउ ?

काठमाण्डौ । अन्तर्राष्ट्रिय बजारमा कच्चा तेलको मूल्य बढेको छ । आजको कारोबारमा डब्लूटीआई क्रुड र ब्रेन्ट क्रुड दुवैको मूल्य वृद्धि भएको छ ।

डब्लूटीआई क्रुडको मूल्य ०.६१ प्रतिशतले बढ्दै प्रतिब्यारेल ६७.५९ डलर पुगेको छ । यस्तै ब्रेन्ट क्रुडको मूल्य पनि आज ०.५८ प्रतिशतले बढेको छ । यससँगै ब्रेन्ट क्रुडको मूल्य आज प्रतिब्यारेल ७०.०९ डलरमा कारोबार भईरहेको छ ।

अमेरिकी रक्षा सचिवले येमनको हुथी समूहले जहाजमाथि आक्रमण अन्त्य नगरेसम्म जवाफी आक्रमण जारी राख्ने बताएसँगै तेलको आपूर्तिमा अवरोध हुने आँकलनका साथ कच्चा तेलको मूल्य बढेको हो ।

यस्तै चीनको मागमा सुधार आउने सम्भावनाका कारण समेत तेलको मूल्य उकालो लागेको विश्लेषकले बताएका छन् । चीनले वस्तुको उपभोग बढाउनका लागि आइतबार नयाँ सुधारका कार्यक्रमहरु घोषणा गरेको छ ।