हिमालयन र नेपाल रि इन्स्योरेन्सको विभिन्न क्षेत्रमा रु.४०.८६ अर्ब लगानी, सेयरबजारमा जम्मा ६%

काठमाण्डौ । पुनर्बीमा कम्पनीहरुले विभिन्न क्षेत्रमा करिब ४१ अर्ब रुपैयाँ लगानी गरेका छन् । नेपाल बीमा प्राधिकरणले सार्वजनिक गरेको तथ्याङ्कअनुसार हिमालयन रि इन्स्योरेन्स र नेपाल रि इन्स्योरेन्सले चालु आवको तेस्रो त्रैमाससम्म विभिन्न क्षेत्रमा ४० अर्ब ८६ करोड ७४ लाख रुपैयाँ लगानी गरेका हुन् ।  

जसमा नेपाल रि इन्स्योरेन्सको क्षेत्रगत लगानी २२ अर्ब २८ करोड रहेको छ भने हिमालयन रि इन्स्योरेन्सको १८ अर्ब ५८ करोड रहेको छ ।  

नेपाल बीमा प्राधिकरणले बीमा कम्पनीहरुलाई लगानी विविधिकरण गर्न निर्देशन दिदै आइरहेको छ । सोहीबमोजिम नै जीवन र निर्जीवन बीमा कम्पनीहरुले लगानी विविधिकरण गर्नका लागि विभिन्न क्षेत्रमा लगानी गर्न थालेका छन् ।  

तर यता दुई पुनर्बीमा कम्पनीको ७१.८६ प्रतिशत लगानी भने बैंक तथा वित्तीय संस्थाको मुद्दती निक्षेपमा नै सीमित देखिएको छ । तेस्रो त्रैमाससम्म दुई पुनर्बीमा कम्पनीले मुद्दती निक्षेपमा मात्रै २९ अर्ब ३६ करोड ९६ लाख रुपैयाँ लगानी गरेका छन् भने बाँकी २८ प्रतिशत रकम मात्रै सेयरबजार, म्युचुअल फण्ड र अन्य संस्थापक सेयरमा लगानी गरेका छन् ।  

बीमकको लगानी निर्देशिका बमोजिम पुनर्बीमा कम्पनीहरुले कुल लगानीको १० प्रतिशत रकम वाणिज्य बैंक, विकास बैंक र पूर्वाधिक विकास बैंकको मुद्दती निक्षेपमा लगानी गर्न पाउने व्यवस्था छ भने ग वर्गको वित्तीय संस्थामा ५ प्रतिशत मात्रै लगानी गर्न पाइने व्यवस्था छ ।  

कुल लगानीको २० प्रतिशतसम्म लगानी गर्न पाइने सरकारको बचतपत्र वा ऋणपत्रमा पुनर्बीमा कम्पनीहरुको कुल ३० करोड लगानी रहेको छ । यो लगानी नेपाल रि इन्स्योरेन्सको मात्रै हो । हिमालयन रि को यस्तो क्षेत्रमा लगानी शुन्य छ ।  

त्यस्तै, सूचीकृत पब्लिक कम्पनीको सेयर अर्थात् सेयरबजारमा दुई पुनर्बीमाको कुल २ अर्ब ४५ करोड रुपैयाँ लगानी रहेको छ । यो लगानी कुल लगानीको जम्मा ६ प्रतिशत लगानी हो । जसमा नेपाल रि इन्स्योरेन्सको सेयरबजारमा ९ करोड ४७ लाख रुपैयाँ मात्रै लगानी छ भने हिमालयन रि इन्स्योरेन्सको २ अर्ब ३६ करोड १० लाख रुपैयाँ रहेको छ ।  

पुनर्बीमा कम्पनीहरुले कुल लगानीको १० प्रतिशत रकम सेयरबजारमा लागनी गर्न पाउने व्यवस्था छ । तर रि इन्स्योरेन्स कम्पनीहरुको सेयरबजारमा लगानी त्यति ग्रोथ देखिएको छैन ।  

त्यस्तै, इन्भेष्टमेन्ट कम्पनीको सेयष्रमा ९० करोड, नागरिक लगानी कोष र म्युचुअल फण्डमा ९ करोड ९ लाख, अन्य संस्थापक सेयरमा ९७ करोड ६२ लाख, सूचीकृत नभएको पब्लिक कम्पनीको सेयरमा ५० करोड ७२ लाख र अन्य लगानी ७५ करोड रुपैयाँ रहेको छ ।