भाटभटेनीको चुच्चेपाटीमा फेला परेका ६ शव कर्मचारीको होइन, चोरी गर्न पुगेकाको हुनसक्छ !

काठमाण्डा । भाटभटेनी सुपरमार्केटको चावहिल चुच्चेपाटीस्थित आगजनीले ध्वस्त आउटलेटमा ६ जनाको शव फेला परेको छ ।  

भाटभटेनीको सो आउटलेटबाट आज बिहानसम्म पनि धूँवा आइरहेको छ । यसको अर्थ अझै पनि त्यहाँको आगजनी पूर्ण रुपमा नियन्त्रण भइसकेको छैन ।  

आगजनी राजी रहेको स्टोरको भित्री भागबाटै ६ जनाको शव फेला परेपछि त्यसको सनाखतका लागि प्रहरीले अनुसन्धान थालेको छ । 

ती ६ शव कसका थिए ? के भाटभटेनीका सोही स्टोरमा कार्यरत कर्मचारीहरु थिए ? वा को थिए ?

भाटभटेनी सुपरमार्केटका प्रतिनिधि पानु पौडेलका अनुसार चुच्चेपाटीको सो स्टोरमा कार्यरत कुनै पनि कर्मचारी हराएका छैनन् । सबै सकुशल छन् ।  

यसको अर्थ हो, सो स्टोरको आगजनीमा परेर मृत्यु हुनेहरु भाटभटेनीका कर्मचारी थिएनन् ।  

यसको अर्को सम्भावना हो, सो स्टोरमा तोडफोड र लुटपाट हुन थालेपछि त्यसमै सहभागी भई सामान चोरी गर्न गएकाहरु तलबाट अचानक लगाइएको आगोमा फसेर मृत्यु भएका हुनसक्छन् ।

 घटनाको प्रकृति हेर्दा र प्रारम्भिक आशंकाका आधारमा धरानको भाटभटेनीमा जस्तै चुच्चेपाटीको भाटभटेनीमा पनि त्यहाँ लुटपाट र चोरीको उद्देश्यले पुगेको समूहकै ६ जनाको मृत्यु भएको अनुमान गर्न सकिन्छ ।