साना लगानीकर्तालाई मध्यनजर गर्दै प्रभु क्यापिटलले एसआइपी ल्याउने, उच्च रिटर्नको सम्भावना

काठमाण्डौ । सानो रकमबाट सुरु गर्न सकिने वा साना लगानीकर्ताका लागि उपयुक्त लगानीको माध्यम भनेकै खुलामुखी योजना (ओपन इन्डेड म्युचुअल फण्ड)मा लगानी गर्नु हो ।  

खुलामुखी योजना र एसआइपी लगानीका लागि दुई छुट्टाछुट्टै माध्यम भएपनि एकअर्कासँग सम्बन्धित अवधारणा हुन् । यी दुबै म्युचुअल फण्डसँग जोडिएका हुन्छन् र लगानीकर्तालाई सजिलो, लचिलो र सुरक्षित तरिकाले लगानी गर्न मद्दत गर्दछ ।  

प्रभु क्यापिटल लिमिटेडको पहिलो खुलामुखी योजना निष्कासन भई बाँडफाँड भइसकेको छ । साना लगानीकर्तालाई मध्यनजर गर्दै क्यापिटलले ४० करोड रुपैयाँ बराबरको खुलामुखी योजना सार्वजनिक निष्कासन गरेको थियो ।  

क्यापिटलले अंकित मूल्य १० रुपैयाँ दरको ४ करोड इकाई भएको ‘प्रभु सिस्टमेटिक इन्भेष्टमेन्ट स्किम’ योजना जारी गरेको थियो । क्यापिटलको यो योजना दोस्रो बजारमार्फत खरिद गर्न मिल्दैन । नेप्सेमा सूचीकृत नहुने खुलामुखी सामूहिक लगानी कोष योजनामा दोस्रो बजारमार्फत लगानी गर्न सकिँदैन ।  

प्रभु क्यापिटलको खुलामुखी योजनामा लगानी गर्न छुटेमा लगानीकर्ताहरुले पिर मान्नु पर्दैछ । अहिले क्यापिटलहरुले सिस्टमेटिक इन्भेष्टमेन्ट प्लान (एसआईपी)ल्याएका हुन्छन् । जसमार्फत लगानीकर्ताहरुले ढुक्कसँग यस्ता खुलामुखी योजना लगानी गर्न सक्नेछन् । प्रभु क्यापिटलले पनि खुलामुखी योजनालक्षित गरी भविष्यमा एसआइपी ल्याउने सम्भावना बढी देखिएको छ ।  

क्यापिटलका अनुसार यो खुलामुखी योजनाको न्याभ (२०८१ असार मसान्तसम्म) १०.०४ रुपैयाँ रहेको छ, जुन औषतमा एकदमै राम्रो मानिन्छ । साथै सो अवधिसम्म फण्डको कुल सम्पत्ति ४० करोड २३ लाख ५४ हजार रुपैयाँ रहेको छ ।  

सो अवधिसम्म यो फण्डको आम्दानी ४२ लाख ८२ हजार ८७३ रुपैयाँ रहेको छ भने फण्डको खुद मुनाफा १७ लाख ६३ हजार १७० रुपैयाँ देखिएको छ ।  

लगानी गर्दा हुने सक्ने फाइदाहरुः

विशेषगरी एसआइपीमा लगानी गर्दा तरलता, सानो पूँजीबाट सुरु गर्ने क्षमता, जोखिम न्यूनीकरण र व्यवसायिक व्यवस्थापन जस्ता थुप्रै फाइदा हुन सक्छ ।  

थोरै रकमबाट दीर्घकालिन लगानी गरेर उच्च रिटर्न खोज्नेहरुका लागि एसआइपीमा लगानी गर्दा फाइदा हुने देखिन्छ । साथै सेयरबजारको अनुभवबिना पनि लगानी गर्न चाहानेहरुका लागि यो योजना उपयुक्त विकल्प हुन सक्छ ।  

फण्डको न्याभ, पोर्टफोलियो र समग्र वित्तीय प्रदर्शन लगायका विवरणहरु क्यापिटलले नियमित सार्वजनिक गर्ने भएकाले आफुले लगानी गरेको खुलामुखी फण्डको प्रदशर्नको अपडेट लिन सकिन्छ । न्यूनतम १ हजार रुपैयाँबाट लगानी गर्न सकिने एसआइपीमा लगातार खरिद र फिर्ता गर्न सकिने सुविधा पनि रहेको हुन्छ ।  

क्यापिटलहरुले साना लगानीकर्तालाई मध्यनजर गर्दै एसआइपी सञ्चालन गरिरहेका छन् । जसबाट मासिक रुपमा लगानीकर्ताबाट केही रकम संकलन गरी यस्ता खुलामुखी योजनामा लगानी गरिएको हुन्छ ।  

साथै त्यस्ता खुलामुखी योजनाले विभिन्न कम्पनीको सेयर, बण्ड वा अन्य वित्तीय साधनमा लगानी गरेको हुन्छ र यसले जोखिम कम गर्छ ।  

साथै फण्डको न्याभको आधारमा क्यापिटलले भविष्यमा उत्कृष्ट लाभांश दिन सक्ने सम्भावना देखिन्छ, जसबाट लगानीकर्ताले केही प्रतिशत भएपनि रिटर्न पाउने देखिन्छ । सेयरबजारमा लगानी गरेजस्तो ह्वात्तै पोर्टफोलियो घट्ने रिस्क एसआइपीमा हुँदैन ।