निर्जीवन बीमा कम्पनीहरुले संकलन गरे रु.१५.८४ अर्ब प्रिमियम, मोटर र सम्पत्ति बीमा व्यवसायमा उल्लेख्य वृद्धि

काठमाण्डौ । निर्जीवन बीमा व्यवसाय १२.४२ प्रतिशतले वृद्धि भएको छ । नेपाल बीमा प्राधिकरणका अनुसार चालु आवको ४ महिनासम्ममा १४ निर्जीवन बीमा कम्पनीहरुले १५ अर्ब ८४ करोड ८२ लाख रुपैयाँ प्रिमियम संकलन गरेका छन् । यो व्यवसाय गत आवको तुलनामा १२ प्रतिशत बढी हो । 

गत आवको कात्तिक मसान्तसम्म निर्जीवन बीमा कम्पनीहरुले १४ अर्ब ९ करोड ७२ लाख रुपैयाँ प्रिमियम भित्र्याएका थिए । गत आवको तुलनामा तीन कम्पनी बाहेक सबै कम्पनीको व्यवसाय बढेको देखिएको छ । सरकारी स्वामित्वमा रहेको राष्ट्रिय बीमा कम्पनीको व्यवसाय गत आवको तुलनामा २८.९३ प्रतिशतले खस्किएको छ भने नेको इन्स्योरेन्सको ०.३९ प्रतिशत र दि ओरियन्टल इन्स्योरेन्सको व्यवसाय ०.५० प्रतिशतले खस्किएको छ ।

निर्जीवन बीमकहरुले सर्वाधिक मोटर बीमामार्फत प्रिमियम भित्र्याएका छन् । सो अवधिसम्म मोटर बीमालेखमार्फत बीमकहरुले ५ अर्ब ५१ करोड २४ लाख रुपैयाँ प्रिमियम संकलन गरेका छन् । जुन यो गत आवको सोही अवविधसम्मको तुलनाामा २० प्रतिशत बढी हो । त्यस्तै, सम्पत्ति बीमा व्यवसाय पनि ८.८४ प्रतिशतले वृद्धि भएको छ । कम्पनीहरुले सम्पत्ति बीमा व्यवसायमार्फत ४ अर्ब १८ करोड २६ लाख रुपैयाँ प्रिमियम संकलन गरेका छन् । 

जेनजी आन्दोलनका कारण निजी क्षेत्रतर्फ प्रतिकुल असर पारेसँगै सम्पत्ति र मोटर बीमा व्यवसाय उल्लेख्य बढेको देखिन्छ । जेनजी आन्दोलनका कारण सरकारी तथा निजी क्षेत्रका सवारी साधन लगायत सम्पत्तिमा ठूलो असर परेको थियो । जसकारण अहिले सम्पत्ति र मोटर बीमाको महत्व पनि बढ्दै गएको देखिन्छ । सो अवधिसम्म सर्वाधिक ब्यवसाय संकलन गर्नेमा सगरमाथा लुम्बिनी इन्स्योरेन्स रहेको छ । 

कम्पनीले १ अर्ब ७८ करोड ३६ लाख रुपैयाँ प्रिमियम संकलन गरेको छ । यो रकम गत आवको सोही अवधिसम्मको तुलनामा सामान्य बढी हो । 

त्यस्तै, दोस्रो धेरै प्रिमियम भित्र्याउने कम्पनीमा शिखर इन्स्योरेन्स रहेको छ । यो कम्पनीले १ अर्ब ७३ करोड ८६ लाख रुपैयाँ प्रिमियम संकलन गरेको छ । कम्पनीको व्यवसाय गत आवको सोही अवधिसम्मको तुलनामा २३.२८ प्रतिशतले बढेको छ । 

यसका साथै हिमालयन एभरेष्टले १ अर्ब ६० करोड, सिद्धार्थ प्रिमियरले १ अर्ब ५४ करोड, आइजीआई प्रुडेन्सियलले १ अर्ब २७ करोड, एनएलजीले १ अर्ब २६ करोड, नेकोले १ अर्ब १४ करोड, युनाइटेड अजोडले १ अर्बा ७ करोड, सानिमा जिआइसीले १ अर्ब २ करोड, दि ओरियन्टलले ९२ करोड ४० लाख, नेपाल इन्स्योरेन्सले ८६ करोड ६२ लाख, प्रभु इन्स्योरेन्सले ६५ क रोड ७१ लाख, नेशनल इन्स्योरेन्सले ५० करोड ९५ लाख र राष्ट्रिय बीमा कम्पनीले ४३ करोड ७० लाख रुपैयाँ प्रिमियम भित्र्याएको छ । गत आवको तुलनामा सबैभन्दा बढी व्यवसाय ग्रोथ गर्नेमा हिमालयन एभरेष्ट इन्स्योरेन्स रहेको छ । यो कम्पनीको व्यवसाय ३९.६६ प्रतिशत वृद्धि भएको छ ।