प्रधानमन्त्री कार्कीद्वारा स्वास्थ्य बीमा समस्या समाधानका लागि सर्वपक्षिय बैठक आह्वान

काठमाण्डौ । प्रधानमन्त्री सुशीला कार्कीले स्वास्थ्य बीमासम्बन्धी समस्या समाधान गर्न सक्रिय पहल सुरु गरेकी छन्। यसै क्रममा, उनले आज अपराह्न प्रधानमन्त्री तथा मन्त्रिपरिषद्को कार्यालयमा स्वास्थ्य सेवा प्रदायक संस्थाहरू, स्वास्थ्य बीमा बोर्डका प्रतिनिधि र सरोकारवालाहरूसँग छलफल गर्न सर्वपक्षिय बैठक आह्वान गरेकी छन् ।

देशका विभिन्न अस्पतालहरूले स्वास्थ्य बीमाबापतको रकम समयमै नपाउँदा सेवा प्रवाहमा कठिनाइ भईरहेको अवस्थामा प्रधानमन्त्रीबाट सर्वपक्षिय बैठक आह्वान भएको हो । केही अस्पतालहरूले सेवा स्थगित गर्ने चेतावनीसमेत दिएका थिए। स्वास्थ्य सेवा प्रदायकहरूले लामो समयदेखि भुक्तानी नपाउँदा सञ्चालनमा चुनौती भईरहेको जनाउँदै आएका छन्।

प्रधानमन्त्री कार्कीले बैठकमार्फत स्वास्थ्य बीमा प्रणालीलाई पारदर्शी, द्रुत र प्रभावकारी बनाउन आवश्यक सुधारका कदमहरू तय गर्ने लक्ष्य राखेकी छन् छ। यस पहलले अस्पताल र बीमा बोर्डबीचको समन्वय सुधार्ने मात्र नभई सर्वसाधारणले समयमै गुणस्तरीय स्वास्थ्य सेवा पाउने सुनिश्चितता पनि प्रदान गर्ने अपेक्षा गरिएको छ।