आम्दानी बढेपनि खर्च नियन्त्रण गर्न नसक्दा ओम मेगाश्री फर्मास्युटिकल्सको घाटा झनै बढ्यो

काठमाण्डौ । ओम मेगाश्री फर्मास्युटिकल्स लिमिटेडले चालु आवको दोस्रो त्रैमासको अपरिष्कृत वित्तीय विवरण सार्वजनिक गरेको छ । जसअनुसार पुस मसान्तसम्म कम्पनीको घाटा बढेर ३ करोड ८४ लाख रुपैयाँ पुगेको छ ।

गत असोज मसान्तसम्म पनि कम्पनी २ करोड ३० लाख घाटामा थिया । आम्दानीमा बढोत्तरी आएपनि खर्च नियन्त्रण गर्न नसक्दा कम्पनीको घाटा झनै बढ्न गएको देखिन्छ ।

यो अवधिमा कम्पनीको आम्दानी १०३.६७ प्रतिशतले बढेर १० करोड ५१ लाख पुगेको छ । कम्पनीको खर्च भने उल्लेख्य बढेको छ । गत असोज मसान्तसम्म ७ करोड ४६ लाख रहेको कम्पनीको खर्च बढेर १४ करोड ३५ लाख पुगेको छ ।  

पहिलो त्रैमाससम्म कम्पनीको रिटेन्ड अर्निङ ७ करोड ४८ लाख रुपैयाँले ऋणात्मक बनेको छ भने अन्य रिजर्भमा ६ करोड २३ लाख रुपैयाँ सञ्चित रहेको छ ।  

समीक्षा अवधिसम्म कम्पनीको प्रतिसेयर आम्दानी(ईपीएस) वार्षिकिकरण गरिएको १२.८१ रुपैयाँले ऋणात्मक बनेको छ । यस्तै कम्पनीको प्रतिसेयर नेटवर्थ ९७.९३ रुपैयाँ र प्रतिसेयरकुल सम्पत्तिको मूल्य २५४.९२ रुपैयाँ कायम भएको छ ।