मौन अवधिमा अनुशासन र संयमित प्रचार गर्न प्रधानमन्त्री कार्कीको आग्रह

काठमाण्डौ । प्रधानमन्त्री सुशीला कार्कीले आसन्न निर्वाचनलाई स्वच्छ, स्वतन्त्र र भयरहित रूपमा सम्पन्न गर्न मौन अवधिमा पूर्ण अनुशासन पालना गर्न तथा त्यसअघि संयमित र मर्यादित ढंगले प्रचार–प्रसार गर्न आग्रह गरेकी छन् ।

देशबासीका नाममा सम्बोधन गर्दै उनले निर्वाचन प्रक्रियामा खटिएका निर्वाचन आयोग, सुरक्षा निकाय तथा राष्ट्रसेवक कर्मचारीप्रति विशेष धन्यवाद व्यक्त गरिन्। ‘तपाईहरूको निष्पक्षता र मेहनतले नै निर्वाचनलाई स्वच्छ, स्वतन्त्र र भयरहित बनाउनेछ,’ उनले भनिन् ।

प्रधानमन्त्री कार्कीले मुलुकमा दण्डहीनतालाई कुनै पनि हालतमा प्रश्रय नदिने स्पष्ट पारिन्। कानूनबमोजिम गर्नुपर्ने कारबाहीमा सरकार पछि नहट्ने बताउँदै उनले विधिको शासनप्रति सरकार प्रतिबद्ध रहेको उल्लेख गरिन् ।

प्रधानमन्त्रीले देश पुनः इतिहासको महत्वपूर्ण मोडमा उभिएको उल्लेख गर्दै आगामी फागुन २१ गते हुने मतदानले नागरिकको भविष्य निर्धारण गर्ने बताइन्। जटिल र संवेदनशील संक्रमणकालीन अवस्थालाई पार गर्दै मुलुक संविधानको मार्गमा अघि बढ्न सफल भएको उल्लेख गर्दै उहाँले यसलाई नागरिकको संयम र सहकार्यको परिणामको रूपमा चित्रित गरिन् ।

राजनीतिक स्थायित्व र समृद्धिको यात्रालाई सुदृढ बनाउन सबै मतदातालाई अनिवार्य रूपमा मतदानमा सहभागी हुन उहाँले आग्रह गरिन्। ‘भोट हाल्नु भनेको केवल चुनाव चिन्हमा छाप लगाउनु मात्र होइन, आफ्नो र सन्तानको भविष्यबारे निर्णय लिनु हो,’ उनले भनिन्। फागुन २१ गते अन्य काम छाडेर भए पनि मतदान केन्द्रमा पुग्न उनले हार्दिक अपिल गरिन् ।

प्रधानमन्त्रीले चुनावी प्रतिस्पर्धामा रहेका सबै राजनीतिक दल तथा स्वतन्त्र उम्मेदवारलाई धन्यवाद दिँदै उनीहरूको सक्रियताले लोकतन्त्रलाई जीवित राख्ने बताइन्।

साथै, सामाजिक सञ्जाल र केही आमसञ्चार माध्यममार्फत फैलाइँदै आएका तथ्यहीन, कृत्रिम तथा भ्रामक सामग्रीप्रति सजग रहन आग्रह गर्दै त्यस्ता गतिविधिलाई सरकारले निगरानीमा राखी कानुनी दायरामा ल्याइरहेको जानकारी दिइन् ।

सम्बोधनको अन्त्यमा उनले शान्ति र अमनचयन कायम राख्न सबैमा आग्रह गर्दै मुलुकसामु आएको ऐतिहासिक जिम्मेवारी जिम्मेवारीपूर्वक निर्वाह गर्न आह्वान गरिन् ।