निर्वाचनका दिन यात्रुका लागि पर्यटन बोर्डको निःशुल्क सटल बस सेवा

निर्वाचनका दिन यात्रुहरूको आवागमन सहज बनाउन नेपाल पर्यटन बोर्डले निःशुल्क सटल बस सेवा सञ्चालनमा ल्याएको छ।

बोर्डका अनुसार त्रिभुवन अन्तर्राष्ट्रिय विमानस्थल आउने–जाने आन्तरिक तथा अन्तर्राष्ट्रिय हवाई यात्रुलाई लक्षित गर्दै विमानस्थलदेखि काठमाडौं उपत्यकाका प्रमुख होटल र पर्यटकीय क्षेत्रसम्म सटल बस सेवा उपलब्ध गराइएको हो। सेवा बिहान ५ बजेदेखि सुरु भई बिहीबार साँझ ७ बजेसम्म सञ्चालन हुने जनाइएको छ।

निर्वाचनका कारण सवारी आवागमनमा हुन सक्ने असहजतालाई ध्यानमा राख्दै यात्रु र पर्यटकलाई सहज रूपमा विमानस्थल पुग्न मद्दत गर्न यो सेवा सञ्चालन गरिएको बोर्डले जनाएको छ।

सटल बस सेवा तीन फरक मार्गमार्फत सञ्चालन गरिएको छ। पहिलो मार्ग न्युरोड, कान्तिपथ, ठमेल, लैनचौर, नयाँबजार, दरबारमार्ग र गौशाला हुँदै विमानस्थल पुग्नेछ। दोस्रो मार्ग महाराजगञ्ज, नारायणथान, धुम्बाराही, चाबहिल र बौद्ध हुँदै विमानस्थलसम्म सञ्चालन हुनेछ।

त्यसैगरी तेस्रो मार्ग कुपण्डोल, त्रिपुरेश्वर, कलंकी, एकान्तकुना, सातदोबाटो, ग्वार्को र नयाँ बानेश्वर हुँदै विमानस्थलसम्म पुग्ने व्यवस्था गरिएको बोर्डले जनाएको छ।

पर्यटन बोर्डका निमित्त निर्देशक सुनील शर्माले निर्वाचनका दिन यात्रुहरूले समयमै विमानस्थल पुग्न र गन्तव्यमा सहज रूपमा यात्रा गर्न यो सेवाको उपयोग गर्न आग्रह गरेका छन्।