देशभर मतदान, अधिकांश स्थानमा मौसम सफा

प्रतिनिधिसभा निर्वाचनअन्तर्गत देशभर मतदान जारी रहँदा अधिकांश क्षेत्रमा मौसम सामान्यतया सफा रहेको देखिएको छ। मौसम पूर्वानुमान महाशाखाले बिहीबार बिहान ११ बजेसम्मको अवस्थाबारे सार्वजनिक गरेको विवरणअनुसार हाल कोशी, बागमती, गण्डकी र लुम्बिनी प्रदेशका पहाडी तथा हिमाली भू–भागमा आंशिक बदली रहेको छ भने देशका बाँकी भागमा मौसम मुख्यतया सफा रहेको छ।

उपलब्ध उपग्रह चित्रमा नेपालका अधिकांश भूभागमा ठूलो मौसमी प्रणाली सक्रिय नदेखिएको र सामान्य बादल मात्र देखिएको छ। यसका कारण देशका धेरै स्थानमा मतदानका क्रममा मौसमले खासै बाधा नपुर्‍याउने देखिएको मौसमविद्हरूले बताएका छन्।

यस्तै, पछिल्लो २४ घण्टाको वर्षा विवरणअनुसार देशका अधिकांश स्थानमा उल्लेखनीय वर्षा भएको छैन। केही स्थानमा सामान्य मात्रामा वर्षा भएको देखिए पनि त्यसले दैनिक गतिविधिमा ठूलो प्रभाव पारेको छैन।

मौसम सामान्य रहेकाले देशभरका अधिकांश मतदान केन्द्रमा मतदाता सहज रूपमा मतदानमा सहभागी भइरहेका छन्। मौसमविद्हरूका अनुसार आज दिनभर देशका धेरै स्थानमा मौसम आंशिकदेखि सामान्यतया सफा रहने सम्भावना रहेको छ।