मन्त्री सीता वादीको सम्पत्तिको नाममा २० वटा कुखुरा, बैंकमा १५ लाख बचत

काठमाण्डौ । महिला, बालबालिका तथा ज्येष्ठ नागरिक मन्त्री सीता वादीले आफ्नो सम्पत्ति विवरण सार्वजनिक गरेकी छन्। आइतबार सार्वजनिक गरिएको विवरणअनुसार मन्त्री वादीको स्वामित्वमा विभिन्न चल तथा अचल सम्पत्तिहरू रहेको उल्लेख गरिएको छ।

सार्वजनिक विवरणमा मन्त्री वादीसँग २० वटा कुखुरा र एक वटा कुकुर रहेको जनाइएको छ। त्यस्तै, उनको नाममा एक स्कुटर, तीन वटा ल्याप्टप र दुई वटा मोबाइल फोन रहेका छन्। उनका श्रीमान्को नाममा भने पल्सर मोटरसाइकल रहेको उल्लेख छ।

आर्थिक विवरणतर्फ, मन्त्री वादीसँग नगद ५० हजार रुपैयाँ रहेको छ भने उनी र उनका श्रीमान्को संयुक्त नाममा बैंकमा १५ लाख रुपैयाँ मौज्दात रहेको जनाइएको छ।

गरगहनातर्फ उनले १८ तोला सुन र १५ तोला चाँदी रहेको उल्लेख गरेकी छन्। उक्त सुनचाँदी विवाहका क्रममा प्राप्त भएको विवरणमा जनाइएको छ।

अचल सम्पत्तितर्फ मन्त्री वादीको नाममा सुर्खेत मा ८९.६५ वर्ग मिटर क्षेत्रफलको जग्गा रहेको सार्वजनिक गरिएको छ।

सार्वजनिक पदमा रहेका व्यक्तिहरूले आफ्नो सम्पत्ति विवरण सार्वजनिक गर्नुपर्ने कानुनी प्रावधानअनुसार मन्त्री वादीले उक्त विवरण सार्वजनिक गरेकी हुन्।