अप्पर लोहरे खोला हाइड्रोपावर ६०.६६ लाख घाटामा, विद्युत बिक्री आम्दानी बढ्यो

काठमाण्डौ । अप्पर लोहरे खोला हाइड्रोपावर कम्पनी चालु आवको तेस्रो त्रैमाससम्म ६० लाख ६६ हजार रुपैयाँ घाटामा रहेको छ । अघिल्लो आवको सोही अवधिसम्म पनि कम्पनी २ करोड १५ लाख रुपैयाँ घाटामा थियो ।

विद्युत बिक्री आम्दानीमा आएको सुधारका कारण कम्पनीको घाटामा कमी आएको हो । कम्पनीले विद्युत बिक्रीबाट १ करोड ११ लाख रुपैयाँ आर्जन गरेको छ । अघिल्लो आवमा भने यस्तो रकम ९० लाख ४० हजार थियो ।

यस्तै कम्पनीको वित्तीय खर्च समेत घटेको छ । अघिल्लो आवमा १ करोड १८ लाख रुपैयाँ रहेको कम्पनीको वित्तीय खर्च घटेर ६० लाख ४५ हजारमा सीमित बनेको छ । कम्पनीको रिजर्भ भने ३ करोड ३१ लाख रुपैयाँले ऋणात्मक अवस्थामा छ ।

सो अवधिसम्म कम्पनीको प्रतिसेयर आम्दानी (इपीएस)१.१९ रुपैयाँ ऋणात्मक, प्रतिसेयर नेटवर्थ ९३.५० रुपैयाँ, मूल्य आम्दानी अनुपात ४५१.३० गुणा ऋणात्मक र तरलता अनुपात ०.५२ प्रतिशत कायम भएको छ ।