बोल्ने सूचीमा रहेका कृष्णकुमार कार्कीको अनुपस्थितिले संसदको खिच्यो ध्यान, कार्कीको अनुपस्थितिपछि उठ्न थाले प्रश्न

काठमाण्डौँ । राष्ट्रिय स्वतन्त्र पार्टी (रास्वपा)का सांसद कृष्णकुमार कार्की सोमबार प्रतिनिधिसभाको बैठकमा शून्य समयमा बोल्नका लागि नाम दर्ता गराएपनि सदनमा अनुपस्थित भएका छन् ।

प्रतिनिधिसभाको सोमबारको बैठकमा शून्य समयमा उनको नाम बोलाइए पनि उनी पटक–पटकको आह्वानका बाबजुद पनि उपस्थित नभएको संसद् सचिवालय स्रोतले जनाएको छ । 

सभामुख डोलप्रसाद अर्यालले उनलाई तीन पटकसम्म नाम उच्चारण गर्दै बोलाए पनि उत्तर नआएपछि अन्ततः अर्को सांसदलाई समय प्रदान गरिएको थियो ।

शून्य समयलाई संसदमा जनताका समस्या, विकासका मुद्दा तथा नीतिगत प्रश्न उठाउने महत्वपूर्ण अवसरका रूपमा लिइन्छ ।  

तर, सांसद कार्कीको अनुपस्थितिका कारण उनको बोल्ने पालो प्रयोग हुन सकेन र उनको सिट खाली नै देखिएको थियो ।

उक्त घटनापछि सांसद कार्कीको अनुपस्थितिलाई लिएर संसदभित्र र बाहिर चर्चा शुरु भएको छ ।  

सोही समयमा उनका बारेमा विभिन्न सञ्चारमाध्यममा व्यक्तिगत जीवनसँग जोडिएका केही आरोप तथा समाचार सार्वजनिक भएका छन् ।  

 

ती समाचारमा एक विदेशी नागरिकसँग सम्बन्ध तथा त्यससँग सम्बन्धित विवादको विषय उल्लेख गरिएको भएपनि ती दाबीहरू आधिकारिक रूपमा पुष्टि भएका छैनन् ।

कार्की मोरङ निर्वाचन क्षेत्र नम्बर २ बाट निर्वाचित प्रतिनिधिसभा सदस्य हुन् ।

संसदमा बोल्ने अवसर गुमेपछि सभामुखले अन्य सांसदलाई शून्य समयमा आफ्नो धारणा राख्न अनुमति दिएका थिए ।

यसअघि पनि सांसद कार्की विभिन्न सार्वजनिक तथा राजनीतिक गतिविधिका कारण चर्चामा आउने गरेका थिए ।

  पछिल्लो घटनाले उनको संसदीय उपस्थितिमाथि समेत विभिन्न कोणबाट टिप्पणीहरू निम्त्याएको देखिएको छ ।