बलुचिस्तानको क्वेटा नजिक रेलमा शक्तिशालीमा विस्फोट, २४ जनाको मृत्यु

काठमाण्डौं । पाकिस्तानको अशान्त बलुचिस्तान प्रान्त फेरि एकपटक भीषण हिंसात्मक घटनाले स्तब्ध बनेको छ ।  

सैनिक कर्मचारी र उनीहरूका परिवार बोकेको रेललाई लक्षित गरी गरिएको शक्तिशाली विस्फोटमा कम्तीमा २४ जनाको मृत्यु भएको छ भने ५० भन्दा बढी व्यक्ति घाइते भएका छन् । 

अधिकारीहरूले मृतक संख्या अझ बढ्न सक्ने बताएका छन् ।

आइतबार बिहान क्वेटा आसपास भएको विस्फोटपछि क्षेत्रभर उच्च सुरक्षा सतर्कता अपनाइएको छ ।  

उद्धार टोली, सेना र प्रहरी घटनास्थलमा परिचालित भएर भग्नावशेषमा फसेकाहरूको खोजी गरिरहेका छन् ।

प्रारम्भिक जानकारीअनुसार क्वेटाबाट पेसावर जाँदै गरेको रेल चमन क्षेत्रको रेलमार्ग नजिक पुगेका बेला विस्फोटक पदार्थ बोकेको एक सवारीसाधन रेलसँग ठोक्किएको थियो ।  

त्यसलगत्तै भएको ठूलो विस्फोटले रेलका डिब्बाहरू उछिट्टिनुका साथै केही डिब्बा पटरीबाट पल्टिएका छन् ।

घटनास्थलका दृश्यहरू अत्यन्त भयावह देखिएका छन् ।

रेलका झ्याल फुटेका, डिब्बा च्यातिएका तथा भग्नावशेषबीच उद्धारकर्मीहरू जीवित व्यक्तिको खोजीमा जुटिरहेका दृश्य सार्वजनिक भएका छन् ।

घाइतेहरूलाई तत्काल अस्पताल पठाइएको छ भने सुरक्षाकर्मीहरूले क्षेत्रलाई नियन्त्रणमा लिएर थप जोखिम रोक्ने प्रयास गरिरहेका छन् ।

अधिकारीहरूका अनुसार रेलमा रहेका धेरै सैनिक कर्मचारीहरू इद बिदा मनाउन परिवारसहित घर फर्किरहेका थिए ।  

रेलमा महिला र बालबालिकासमेत सवार रहेकाले घटनाले थप मानवीय त्रास सिर्जना गरेको बताइएको छ ।

बलुचिस्तान लामो समयदेखि विद्रोह, बम आक्रमण र पृथकतावादी गतिविधिको केन्द्र बन्दै आएको क्षेत्र हो ।  

यहाँ सक्रिय बलुच विद्रोही समूहहरूले केन्द्र सरकारले स्थानीय प्राकृतिक स्रोतको दोहन गरे पनि स्थानीय समुदायलाई त्यसको लाभ नदिएको आरोप लगाउँदै आएका छन् ।

पछिल्लो रेल विस्फोटलाई पाकिस्तानको सुरक्षा अवस्थामाथि अर्को ठूलो चुनौतीका रूपमा हेरिएको छ ।  

विशेषगरी सैनिक र सुरक्षाकर्मीलाई लक्षित गर्दै भइरहेका आक्रमणले बलुचिस्तानमा सुरक्षा संकट अझ गहिरिँदै गएको विश्लेषण गरिएको छ ।