गर्मीको असर : कृष्णपुर नगरपालिकाले तीन दिन विद्यालय बन्द गर्ने

काठमाण्डौं । कृष्णपुर नगरपालिकाले बढ्दो गर्मी र ‘लू’ को असरका कारण नगरभित्रका विद्यालय तीन दिनका लागि बन्द गर्ने निर्णय गरेको छ ।  

पश्चिम तराई क्षेत्रमा तापक्रम निरन्तर बढ्दै गएपछि बालबालिकाको स्वास्थ्य जोखिम बढेको भन्दै स्थानीय तहले सोमबारदेखि लागू हुने गरी पठनपाठन स्थगित गरेको हो ।

नगरपालिकाले जारी गरेको सूचनाअनुसार नगर क्षेत्रका सबै सामुदायिक तथा संस्थागत विद्यालयमा तीन दिन बिदा दिइएको छ ।

उक्त बिदा भने सञ्चित बिदाबाट कट्टा गरिने जनाइएको छ ।

पछिल्ला केही दिनयता पश्चिम तराईमा अत्यधिक गर्मी बढ्दै गएको छ ।  

दिउँसोको समयमा तापक्रम ४० डिग्री सेल्सियस आसपास पुग्न थालेपछि विद्यालय जाने बालबालिकालाई आवतजावत गर्नसमेत कठिन हुन थालेको स्थानीय प्रशासनले जनाएको छ ।

नगर प्रमुख हेमराज ओझाका अनुसार बालबालिकाको स्वास्थ्यलाई प्राथमिकतामा राख्दै तत्कालका लागि विद्यालय बन्द गर्ने निर्णय गरिएको हो ।  

उनका अनुसार अहिलेको गर्मी सामान्य अवस्थाभन्दा धेरै बढी भएकाले विद्यालय सञ्चालन गर्दा विद्यार्थी प्रभावित हुन सक्ने जोखिम देखिएको छ ।

स्वास्थ्यकर्मीहरूले अत्यधिक गर्मीका कारण डिहाइड्रेसन, थकान, ज्वरो, टाउको दुख्ने, चक्कर लाग्ने तथा ‘हीट स्ट्रोक’ जस्ता समस्या बढ्न सक्ने चेतावनी दिएका छन् ।

विशेषगरी बालबालिका, ज्येष्ठ नागरिक र दीर्घरोगी बढी जोखिममा पर्ने भएकाले सावधानी अपनाउन आग्रह गरिएको छ ।

पश्चिम तराईका विभिन्न जिल्लामा अहिले ‘लू’ को प्रभाव बढ्दै गएको छ ।  

दिउँसो बजार, सडक तथा सार्वजनिक स्थलहरू सुनसानजस्तै हुन थालेका छन् ।  

अत्यधिक गर्मीका कारण दैनिक जनजीवनसमेत प्रभावित बनेको छ ।

स्वास्थ्य विज्ञहरूले प्रशस्त पानी पिउन, हल्का र सूती कपडा लगाउन, लामो समय घाममा नबस्न तथा अत्यावश्यक बाहेक दिउँसो बाहिरी गतिविधि नगर्न सुझाव दिएका छन् ।