पर्यटन मन्त्रालयअन्तर्गतका १७ निकायमा ४ हजार ३४८ आवेदन

काठमाण्डौ । संस्कृति, पर्यटन तथा नागरिक उड्डयन मन्त्रालय अन्तर्गतका १७ वटा निकायमा रिक्त पदहरूका लागि ४ हजार ३४८ जनाले आवेदन दिएका छन्।  मन्त्रालयले विभिन्न १७ वटा निकायमा गत वैशाख ३१ गतेदेखि जेठ ६ गतेसम्मका लागि दरखास्त आह्वान गरेको थियो ।

मन्त्रालयका अनुसार आवेदन दिनेमा पुरुष ३ हजार ४१४, महिला ९२१ र अन्य १३ जना रहेका छन्। सबैभन्दा बढी आवेदन नेपाल पर्यटन बोर्डमा ८५५ र नेपाल नागरिक उड्डयन प्राधिकरण मा ५७८ परेको छ। त्यस्तै पशुपति क्षेत्र विकास कोषमा ४७६, लुम्बिनी क्षेत्र विकास कोषमा ४६५ र नेपाल प्रज्ञा प्रतिष्ठान ४३८ जना रहेका छन् ।

त्यसैगरी, सङ्गीत तथा नाट्य प्रज्ञा प्रतिष्ठानमा १९६, ललितकला प्रज्ञा प्रतिष्ठानमा १६६, सांस्कृतिक संस्थानमा १५१ र बृहत्तर जनकपुर क्षेत्र विकास परिषद्मा १८६ जनाबाट आवेदन परेको मन्त्रालयले जनाएको छ।

नेपाल पञ्चाङ्ग निर्णायक विकास समितिमा ४६ जनाको आवेदन परेको छ ।

मन्त्रालयका अनुसार हाल मूल्यांकन समितिले सबै आवेदनहरूको अध्ययन तथा छानबिन प्रक्रिया अघि बढाइरहेको छ।