संसदमा हर्क साम्पाङको विद्रोह : प्रधानमन्त्री खोज्दै बैठक बहिष्कार

काठमाण्डौं । हर्क साम्पाङले प्रधानमन्त्री बालेन्द्र शाह संसदप्रति उत्तरदायी नभएर निरन्तर संसद अनुपस्थितिप्रति असन्तुष्टि जनाउँदै प्रतिनिधिसभा बैठकबाट बाहिरिएका छन् ।  

प्रधानमन्त्री संसदमा उपस्थित भएर जनप्रतिनिधिहरूका प्रश्नको जवाफ दिनुपर्ने माग राख्दै उनले बैठक बहिष्कार गरेका हुन् ।

प्रतिनिधिसभा बैठकमा बोल्दै साम्पाङले सरकार संसदप्रति उत्तरदायी देखिन नसकेको आरोप लगाए ।  

उनले प्रधानमन्त्रीले संसदलाई प्राथमिकता नदिएको टिप्पणी गर्दै जनताको प्रश्नमाथि सरकार मौन बसेको गुनासो गरेका थिए ।

डोलप्रसाद अर्याललाई सम्बोधन गर्दै उनले प्रतिनिधिसभा नियमावली कार्यान्वयनमा गम्भीर कमजोरी देखिएको बताए ।

नियमावलीअनुसार संसदमा उठेका विषयमा प्रधानमन्त्री वा मन्त्रीले सात दिनभित्र जवाफ दिनुपर्ने भएपनि व्यवहारमा त्यसको पालना नभएको उनको भनाइ थियो ।

 

साम्पाङले “प्रधानमन्त्री संसदमा आउँदैनन् भने यहाँ बस्नुको अर्थ छैन” भन्दै आक्रोश व्यक्त गरेका थिए ।  

सभामुखसँग केहीबेर संवाद र सवाल–जवाफपछि उनी बैठक कक्षबाट बाहिरिएका थिए ।

पछिल्लो समय प्रधानमन्त्रीको संसद अनुपस्थिति, नियमित प्रश्नोत्तर कार्यक्रम स्थगित हुनु तथा सरकारको जवाफदेहितामाथि उठिरहेका प्रश्नले संसदभित्र सत्ता–विपक्ष तनाव बढ्दै गएको छ ।

 साना दलहरूले समेत संसदको मर्यादा र नियमावली कार्यान्वयनलाई लिएर खुलेर असन्तुष्टि जनाउन थालेका छन् ।