मधेशमा मन्त्रालय संख्या घटाउने तयारी, अध्ययनका लागि तीन सदस्यीय कार्यदल गठन

काठमाण्डौ। मधेश प्रदेश सरकारले मन्त्रालयहरूको संख्या घटाउने तयारीस्वरूप तीन सदस्यीय कार्यदल गठन गरेको छ। मंगलबार बसेको प्रदेश मन्त्रिपरिषद् बैठकले अर्थमन्त्री युवराज भट्टराईको संयोजकत्वमा कार्यदल गठन गर्ने निर्णय गरेको हो।

कार्यदलमा मुख्यमन्त्री तथा मन्त्रिपरिषद् कार्यालयकी सचिव पार्वती शर्मा र ऊर्जा, सिँचाइ तथा खानेपानी मन्त्रालयका सचिव होमनाथ पौडेल सदस्य रहेका छन्।

सत्ता समीकरण परिवर्तनपछि गठबन्धनमा आबद्ध तीन राजनीतिक दलबीच भएको १५ बुँदे सहमतिअनुसार मन्त्रालयहरूको संख्या घटाउने विषयलाई प्राथमिकतामा राखिएको छ। सोही सहमतिलाई कार्यान्वयन गर्न प्रदेश सरकारले कार्यदल गठन गरेको जनाइएको छ।

हाल मधेश प्रदेशमा मुख्यमन्त्री तथा मन्त्रिपरिषद् कार्यालयसहित १२ वटा मन्त्रालय सञ्चालनमा छन्। गठबन्धन दलहरूबीच मन्त्रालयको संख्या १२ बाट घटाएर ९ वटामा सीमित गर्ने सहमति भएको छ।