काठमाण्डौ महानगरको बजेट आकार बढ्यो, रु.२५.८८ अर्ब विनियोजन

काठमाण्डौ । काठमाडौं महानगरपालिकाले आगामी आर्थिक वर्ष २०८३÷८४ का लागि पौने २६ अर्ब रुपैयाँ बराबरको बजेट सार्वजनिक गरेको छ ।  

महानगरकी कार्यवाहक मेयर सुनिता डंगोलले बजेट प्रस्तुत गर्दै आगामी आवको लागि काठमाण्डौ महानगरपालिकाको लागि २५ अर्ब ८८ करोड ३० लाख ५५ हजार रुपैयाँ बराबरको बजेट विनियोजन भएको बताईन् ।

काठमाण्डौ महानगरपालिकाले चालु आवका लागि २५ अर्ब ११ करोड ४३ लाख ४१ हजार रुपैयाँको बजेट पारित गरेको थियो ।

महानगरको नीति तथा कार्यक्रम कार्यान्वयनका लागि सञ्चित कोषबाट २५ अर्ब १३ करोड ३० लाख ५५ हजार रुपैयाँ खर्च हुने तथा ७५ करोड रुपैयाँ अन्य बाह्य व्ययभार रहने अनुमान गरिएको छ ।

डंगोलका अनुसार आगामी आवमा सञ्चित कोषमा २५ अर्ब १३ करोड ३० लाख ५५ हजार रुपैयाँ जम्मा हुने अनुमान गरिएको छ । महानगरको आन्तरिक आय तथा बैंक मौज्दातबाट २० अर्ब १८ करोड ६३ लाख २९ हजार रुपैयाँ स्रोत व्यवस्थापन हुने अपेक्षा गरिएको छ ।

त्यसैगरी नेपाल सरकार र प्रदेश सरकारबाट ससर्त, समानीकरण तथा राजस्व बाँडफाँडमार्फत ४ अर्ब ९३ करोड ६७ लाख २६ हजार रुपैयाँ अनुदान प्राप्त हुने अनुमान गरिएको छ । जनसहभागिताबाट थप १ करोड रुपैयाँ जुट्ने अपेक्षा गरिएको छ ।

क्षेत्रगत रूपमा हेर्दा आर्थिक विकासतर्फ कुल बजेटको २.१ प्रतिशत अर्थात् ५४ करोड १८ लाख २० हजार रुपैयाँ विनियोजन गरिएको छ । सामाजिक विकासका लागि २ अर्ब ४२ करोड २७ लाख ३१ हजार रुपैयाँ (९.६ प्रतिशत) छुट्याइएको छ ।

पूर्वाधार विकासका लागि भने महानगरले १५ अर्ब ३१ करोड ६७ लाख ४८ हजार रुपैयाँ अर्थात् कुल बजेटको ६१ प्रतिशत प्रस्ताव गरिएको छ । सुशासन तथा अन्तरसम्बन्धित क्षेत्रका लागि २ अर्ब १३ करोड ४७ लाख ९२ हजार रुपैयाँ (८.५ प्रतिशत) विनियोजन गरिएको छ भने कार्यालय सञ्चालन तथा प्रशासनिक खर्चका लागि ४ अर्ब ७१ करोड ६९ लाख ६४ हजार रुपैयाँ अर्थात् १८.८ प्रतिशत बजेट छुट्याइएको छ ।