नेप्सेमा प्राविधिक गडबडी, कारोबारपछि सूचक ३७ प्रतिशतले घटेको देखियो, आत्तिए लगानीकर्ता !

काठमाण्डौ । नेपाल स्टक एक्सचेञ्ज (नेप्से)मा प्राविधिक गडबडी देखिएको छ । शुक्रबारको नियमित कारोबार बन्द भइसकेपछि नेप्से परिसूचक १००८.९३ अंक अर्थात् ३७ प्रतिशतले घटेर १७१७.७९ विन्दुमा कायम भएको देखिएको छ ।  

यसरी अस्वभाविक रुपमा नेप्से घटेको देखिएपछि लगानीकर्ताहरुमा अन्योलता सिर्जना भएको छ । शुक्रबारको नियमित कारोबारमा नेप्से परिसूचक ७.९० अंकले बढेर २,७३४.६३ बिन्दुमा बन्द भएको थियो ।  

तर, बजार बन्द भएको केही मिनेटपश्चात् नेप्सेको वेबसाइट तथा प्रणालीमा परिसूचक १,७१७.७९ बिन्दुमा झरेको देखियो, जुन यो ३७ प्रतिशतको गिरावट हो ।

कारोबार सम्पन्न भइसकेपछि अचानक सूचकमा यस्तो ठूलो गिरावट देखिएपछि धेरै लगानीकर्ताले बजारमा कुनै असामान्य घटना भएको हुन सक्ने आशंका गरिन थालिएको छ । प्रारम्भिक रूपमा भने यो वास्तविक कारोबारको परिणाम नभई प्रणालीमा आएको प्राविधिक समस्याका कारण भएको अनुमान गरिएको छ ।

बजार यसरी अस्वाभाविक रुपमा घटेपछि सेयर लगानीकर्ता संघ नेपालका अध्यक्ष तारा प्रसाद फुल्लेलले नेप्सेलाई इङ्गित गर्दै अब तिमिलाई के हुन्छ, कलिया ? भन्दै व्यङ्ग्य गरेका छन् ।  

यस नेप्सेका प्रवक्ता मुराहरी पराजुलीसँग बुझ्न खोज्दा उनी सम्पर्कमा आएनन् ।

नेप्सेको साइट हाल खुलेको छैन । साइट खोल्दा मेन्टेनेन्समा रहेका कारण केही समयपछि साइट खुल्ने सन्देशसहित डिस्प्लेमा देखिएको छ ।