काठमाण्डौमा मोरक्कन संस्कृति र पर्यटनको प्रदर्शनी हुने, प्रवेश निःशुल्क

काठमाण्डौ । मोरक्कोको राष्ट्रिय दिवसको अवसरमा काठमाडौंमा विशेष प्रदर्शनी आयोजना हुने भएको छ । मोरक्कोको समृद्ध सांस्कृतिक सम्पदा, इतिहास तथा पर्यटन प्रवर्धन गर्ने उद्देश्यले प्रदर्शनीको आयोजना गर्न लागिएको हो ।

नेपालका लागि मोरक्को अधिराज्यको वाणिज्य दूतावासको आयोजनामा अगस्ट २ (आइतबार) ललितपुरको द प्लाजामा प्रदर्शनी आयोजना गर्न लागिएको हो । प्रदर्शनी बिहान ११ बजेदेखि साँझ ५ बजेसम्म सञ्चालन हुनेछ । प्रदर्शनीमा अवलोकनका लागि प्रवेश शुल्क लाग्नेछैन ।

प्रदर्शनीमा मोरक्कन परिकार, सांगीतिक प्रस्तुति, परम्परागत माटोका सामग्री (पोटरी), मोरक्कन शैलीको सजावट, पर्यटनसम्बन्धी जानकारी तथा ट्राभल डेस्क रहनेछन् ।

मोरक्कोको संस्कृति, कला र पर्यटनलाई नेपालीमाझ परिचित गराउन र दुई देशबीचको सांस्कृतिक तथा जनस्तरीय सम्बन्धलाई सुदृढ बनाउन कार्यक्रमको आयोजना गरिएको मोरक्कोका लागि अवैतनिक महावाणिज्यदूत मेघा चौधरीले जानकारी दिए ।

उनले राष्ट्रिय दिवसको अवसरमा नेपाल र मोरक्कोबीचको आपसी सम्बन्धलाई नयाँ उचाइमा पुर्याउन यो प्रदर्शनी महत्वपूर्ण माध्यम बन्ने विश्वास व्यक्त गरे ।

‘यो प्रदर्शनी मोरक्कोको कला, संस्कृति र पर्यटनलाई नेपालीमाझ परिचित गराउने थलो मात्र नभएर नेपाल र मोरक्कोबीचको द्विपक्षीय सम्बन्ध, सहकार्य, व्यापार तथा पर्यटकीय आदानप्रदानलाई थप मजबुत बनाउनेछ भन्ने विश्वास लिएको छु,’ महावाणिज्यदूत मेघा चौधरीले भने ।