सडक आन्दोलनको तयारीमा एमाले, महासचिव पोखरेलद्वारा मातहत कमिटीलाई सतर्क रहन निर्देशन

काठमाण्डौ। प्रतिपक्षी दल नेकपा एमालेले सरकारविरुद्ध सडक आन्दोलनको सम्भावनालाई ध्यानमा राख्दै पार्टी संगठनलाई तयारी अवस्थामा रहन निर्देशन दिएको छ।

पार्टीका प्रदेश कमिटीका पदाधिकारी तथा ‘मिसन पार्टी जागरण’का केन्द्रीय प्रतिनिधिहरूसँगको भर्चुअल बैठकलाई सम्बोधन गर्दै शंकर पोखरेलले कुनै पनि बेला आन्दोलनमा उत्रिनुपर्ने अवस्था आउन सक्ने भएकाले मातहतका सबै कमिटीलाई तयारी अवस्थामा रहन आग्रह गरे।

पोखरेलले वर्तमान सरकारप्रति कडा टिप्पणी गर्दै शासकीय अनुभवको अभाव भएका व्यक्तिहरू सरकारको नेतृत्वमा पुगेकाले मुलुक संकटपूर्ण अवस्थाबाट गुज्रिरहेको दाबी गरे। साथै, विभिन्न स्वार्थ समूहहरूले पछिल्लो समय आफ्नो प्रभाव विस्तार गर्न खोजिरहेको उनको आरोप थियो।

उनले सरकार सुरुदेखि नै पूर्वाग्रह र प्रतिशोधको मानसिकताबाट अघि बढेको आरोप लगाउँदै अहिले नियम कानूनको बेवास्ता गर्दै स्वेच्छाचारी शैलीमा शासन सञ्चालन भइरहेको टिप्पणी गरे।