निर्जीवन बीमा कम्पनीहरुले एक महिनामै संकलन गरे रु.५.३२ अर्ब प्रिमियम, व्यवसायमा २३.३९% ग्रोथ

काठमाण्डौ । निर्जीवन बीमा कम्पनीहरुले ५ अर्ब भन्दा बढी प्रिमियम संकलन गरेका छन् । नेपाल बीमा प्राधिकरणका अनुसार चालु आर्थिक वर्ष २०८३–८४ को पहिलो महिनामै निर्जीवन बीमकहरुले ५ अर्ब ३२ करोड ८३ लाख रुपैयाँ बराबरको प्रिमियम संकलन गरेका हुन् ।  

बीमकहरुको यो व्यवसाय गत आर्थिक वर्षको सोही अवधिसम्मको तुलनामा २३.३९ प्रतिशत बढी हो । गत आवको साउन महिनामा निर्जीवन बीमा कम्पनीहरुले ४ अर्ब ३१ करोड ८४ लाख रुपैयाँ बराबरको प्रिमियम संकलन गरेका थिए ।  

सो अवधिसम्ममा सबै कम्पनीको व्यवसायमा उल्लेख्य सुधार देखिएको छ । सबैभन्दा धेरै प्रिमियम संकलन गर्नेमा हिमालयन एभरेष्ट इन्स्योरेन्स रहेको छ । कम्पनीले ५६ करोड २५ लाख रुपैयाँ प्रिमियम संकलन गरेको छ । यो व्यवसाय गत आवको सोही अवधिसम्मको तुलनामा ५४.०१ प्रतिशतले बढी हो ।  

त्यस्तै, सगरमाथा लुम्बिनी इन्स्योरेन्सले ५५ करोड ३२ लाख, एनएलजीले ५३ करोड ४६ लाख, शिखरले ५१ करोड २० लाख, सिद्धार्थ प्रिमियरले ४६ करोड ७६ लाख, आइजीआई प्रुडेन्सियलले ४४ करोड ७१ लाख, दि. ओरियन्टल इन्स्योरेन्सले ४४ करोड ३७ लाख, नेकोले ३८ करोड ८ लाख, युनाइटेड अजोडले ३३ करोड २३ लाख, नेशनल इन्स्योरेन्सले २७ करोड २ लाख, सानिमा जिआइसीले २४ करोड ३ लाख, राष्ट्रिय बीमा कम्पनीले १९ करोड २ लाख र प्रभु इन्स्योरेन्सले १४ करोड ६ लाख रुपैयाँ प्रिमियम संकलन गरेका छन् ।  

गत आवको तुलनामा यस अवधिसम्म सर्वाधिक व्यवसाय ग्रोथ गर्नेमा भने एनएलजी इन्स्योरेन्स रहेको छ । कम्पनीको व्यवसाय गत आवको तुलनामा ५५.३७ प्रतिशत ग्रोथ भएको छ ।