बाढीपीडितलाई बीमा कम्पनीको १६ करोड सहयोग, सीएसआर खर्चमा गणना हुने

काठमाण्डौ । भोटेकोशी–त्रिशुली नदीमा आएको विनाशकारी बाढीबाट प्रभावित नागरिकको उद्धार, राहत तथा पुनःस्थापनाका लागि नेपालका बीमा कम्पनीहरूले १६ करोड रुपैयाँभन्दा बढी आर्थिक सहयोग गरेका छन् ।

हालसम्म प्राप्त विवरणअनुसार जीवन तथा निर्जीवन बीमा कम्पनीहरूले प्रधानमन्त्री दैवी प्रकोप उद्धार कोषमा कुल १६ करोड ७ लाख २३ हजार रुपैयाँ सहयोग उपलब्ध गराएका हुन् ।

बाढीबाट रसुवा, नुवाकोट, धादिङलगायतका जिल्लामा ठूलो जनधनको क्षति भएपछि सरकारले उद्धार, राहत, उपचार तथा पुनःस्थापनाका लागि सहयोग जुटाउँदै आएको छ । प्रधानमन्त्री तथा मन्त्रिपरिषद्को कार्यालयले समेत स्वदेश तथा विदेशमा रहेका व्यक्ति तथा संस्थालाई उद्धार कोषमा सहयोग गर्न आह्वान गरेको छ ।

सरकारको आह्वानबमोजिम कर्पोरेट सेक्टर, निजी क्षेत्र र बैैंक वित्तीय संस्था र बीमा कम्पनीहरुले धमाधम सहयोग गरेका छन् । जीवन बीमातर्फबाट १३ कम्पनीले सहयोग गरेका छन् भने निर्जीवन तर्फबाट ८ कम्पनीले सहयोग गरेको औपचारिक घोषणा भइसकेको छ ।  

जीवन बीमातर्फ राष्ट्रिय जीवन बीमा कम्पनी र निर्जीवनतर्फ एनएलजी, शिखर, राष्ट्रिय बीमा कम्पनी, ओरियन्टल, नेशनल र सानिमा जिआइसीले सहयोग गरेको औपचारिक समाचार आएको छैन ।  

बीमा क्षेत्रबाट हालसम्म २१ कम्पनीले गरेको यो सहयोगले बाढी प्रभावितको तत्काल उद्धार तथा राहत व्यवस्थापनमा थप स्रोत जुटाउन सहयोग पुग्ने अपेक्षा गरिएको छ । पछिल्लो विपद्मा निजी क्षेत्रका विभिन्न संस्था, बैंक तथा व्यावसायिक समूहले पनि प्रधानमन्त्री दैवी प्रकोप उद्धार कोषमा उल्लेख्य रकम सहयोग तथा प्रतिबद्धता जनाएका समेत छन् ।

बीमा कम्पनीहरुले यस्तो विपद्को समयमा सहयोगको अग्रसरता देखाएका छन् । अर्थमन्त्रालयले बैंक तथा वित्तीय संस्था र बीमा कम्पनीहरुले राहतका लागि प्रधानमन्त्री दैवी प्रकोप उद्धार कोषमा गरेको योगदानलाई सामाजिक उत्तरदायित्व कोष (सीएसआर)खर्चको रुपमा मान्यता दिइने व्यवस्था गरेको छ ।  

जसबमोजिम बीमा कम्पनीरुले गरेको यो रकम सीएसआर खर्चको रुपमा गणना गर्न पाउनेछन् ।