२० मिनेटमै २ अर्ब बढीको कारोबार, बन्नसक्छ बुलअघिको खरीद अवसर

काठमाण्डौ । मंगलबार कारोबार खुलेको २० मिनेटमै सेयर बजारमा २ अर्ब बढीको कारोबार भएको छ ।  

अर्थमन्त्री डा. स्वर्णिम वाग्लेले सेयर बजार सृदृढीकरण र पुनरुत्थान कार्ययोजना सार्वजनिक गरी सुधारका २१ बुँदे घोषणा गरेपछि त्यसको प्रभाव बजार खुलेलगत्तैदेखि देखिएको हो । यहीकारण नेप्से परिसूचक उच्च अंकले बढेको छ भने कारोबार रकम पनि उछालको गतिमा बढिरहेको छ । 

नेप्से परिसूचक कारोबार सुरु भएदेखि ९५ अंक हाराहारी बढेर केही करेक्सन भई पुनः बढ्न थालेको छ ।  

यो समाचार तयार पार्दासम्म नेप्से ५४ अंकले बढेर २६३९ को विन्दूमा रहेको छ । कारोबारमा आएकामध्ये २७० कम्पनीको सेयरमूल्य बढेको छ भने ६ कम्पनीको मूल्य घटेको छ । 

सबै समूहको सूचक हराभरा भएका छन् ।  

लगानीकर्ताहरुले आजको कारोबार खुलेलगत्तै अपर सर्किट लाग्ने अपेक्षा गरेका थिए । तर, बजारले त्यो यात्रा तय नगरी बुलअघि खरीदबिक्रीको मौका दिएको देखिएको छ ।