फ्रान्समा विद्यार्थी विद्रोह चर्कियो, हजारौँ पक्राउ, म्याक्रोन सरकार दबाबमा

 

काठमाडौं । फ्रान्समा विद्यार्थी आन्दोलन तीव्र बन्दै गएको छ। विद्यालयमा पर्याप्त स्रोतसाधन, आधारभूत सुविधा र जनशक्ति उपलब्ध गराउनुपर्ने मागसहित सुरु भएको प्रदर्शन विभिन्न सहरमा फैलिँदा सयौं उच्च माध्यमिक विद्यालय प्रभावित भएका छन्।

आन्दोलन चर्किँदै जाँदा केही स्थानमा तोडफोड र आगजनीका घटना भएका छन्। प्रदर्शन नियन्त्रणका क्रममा प्रहरी र विद्यार्थीबीच झडप हुँदा दुवैतर्फ घाइते भएका छन्। दंगा नियन्त्रणका लागि प्रहरीले प्रयोग गरेको बल र हतियारका कारण केही युवा प्रदर्शनकारी गम्भीर घाइते भएको भन्दै सरकारको आलोचना बढेको छ।

यससँगै राष्ट्रपति इम्यानुएल म्याक्रोन नेतृत्वको सरकारमाथि दबाब थपिएको छ।

फ्रान्सका गृहमन्त्री लरेन्ट नुनेजका अनुसार हालसम्म ६ हजार १०० भन्दा बढी प्रदर्शनकारी पक्राउ परेका छन् भने ७१५ प्रहरी अधिकारी घाइते भएका छन्। प्रहरीले अधिकांश घटनामा परिस्थितिअनुसार नै प्रतिक्रिया दिएको उनको दाबी छ।

तर प्रहरी कारबाही अत्यधिक कठोर भएको भन्दै विद्यार्थी संगठन र अधिकारकर्मीले विरोध जनाएका छन्।

स्रोतसाधनको अभावबाट सुरु भयो असन्तोष

विद्यार्थी आन्दोलनको मुख्य कारण विद्यालयहरूमा देखिएको स्रोतसाधनको अभाव हो।

विशेषगरी विपन्न क्षेत्रका विद्यालयमा पर्याप्त डेस्कबेन्च र कुर्सी नहुनु, गर्मीमा कक्षाकोठा अत्यधिक तात्दा वातानुकूलनको व्यवस्था नहुनु तथा शिक्षक र अन्य कर्मचारीको अभाव रहेको भन्दै विद्यार्थीहरूले विरोध सुरु गरेका हुन्।

फ्रान्सको राष्ट्रिय आदर्श वाक्य ‘स्वतन्त्रता, समानता, भ्रातृत्व’ भए पनि विद्यालयबीच स्रोत र अवसरमा ठूलो असमानता रहेको उनीहरूको आरोप छ।

विद्यार्थीहरूले सबै विद्यालयमा समान आधारभूत सुविधा, पर्याप्त जनशक्ति र सुरक्षित अध्ययन वातावरण सुनिश्चित गर्न सरकारसँग माग गरेका छन्।

सेप्टेम्बरको मध्यतिर पेरिस क्षेत्रबाट सुरु भएको प्रदर्शन अहिले अन्य सहर र नगरमा समेत फैलिँदै गएको छ।

मजदुर युनियनको पनि समर्थन

विद्यार्थी आन्दोलनले विस्तार पाउँदै गएपछि मजदुर युनियनहरूले पनि समर्थन जनाउन थालेका छन्।

उच्च माध्यमिक विद्यालयका विद्यार्थीको मागप्रति ऐक्यबद्धता जनाउँदै विभिन्न श्रमिक संगठनले र्‍याली आयोजना गरेका छन्।

मंगलबार पेरिसमा आयोजित प्रदर्शनमा सहभागीहरूले ‘तपाईं भन्नुहुन्छ, युवाहरू नै भविष्य हुन्, त्यसैले उनीहरूको कुरा सुन्नुहोस्’ लेखिएका प्लेकार्ड बोकेका थिए।

आन्दोलनले विद्यार्थीको माग मात्र नभई फ्रान्सको सार्वजनिक शिक्षा प्रणालीभित्रको असमानता, स्रोत वितरण र सरकारी प्राथमिकतामाथि समेत बहस चर्काएको छ।

प्रदर्शन जारी रहँदा सरकारले विद्यार्थीका माग सम्बोधन गर्ने वा सुरक्षा रणनीतिलाई थप कडा बनाउने भन्ने विषय अहिले मुख्य चासो बनेको छ।