गुराँस लघुवित्तको नाफा २.७४ प्रतिशतले बढ्यो, ईपीएस भने घट्यो

काठमाण्डौ । गुराँस लघुवित्त वित्तीय संस्था लिमिटेडले चालु आर्थिक वर्ष २०८३/८४ को पहिलो त्रैमासमा खुद नाफा सामान्य वृद्धि गरेको छ। संस्थाले सार्वजनिक गरेको अपरिष्कृत वित्तीय विवरणअनुसार समीक्षा अवधिमा संस्थाको खुद नाफा २.७४ प्रतिशतले बढेको हो।

संस्थाले चालु आर्थिक वर्षको पहिलो त्रैमासमा १ करोड ४८ लाख ८६ हजार रुपैयाँ खुद नाफा आर्जन गरेको छ। गत आर्थिक वर्षको सोही अवधिमा संस्थाले १ करोड ४४ लाख ८८ हजार रुपैयाँ खुद नाफा कमाएको थियो।

नाफामा सामान्य वृद्धि भए पनि संस्थाको प्रतिसेयर आम्दानी (ईपीएस) भने घटेको छ। समीक्षा अवधिमा ईपीएस १० रुपैयाँ २७ पैसा कायम भएको छ। गत आर्थिक वर्षको सोही अवधिमा यस्तो आम्दानी १० रुपैयाँ ९५ पैसा रहेको थियो।

संस्थाको खुद ब्याज आम्दानी ४ करोड ४० लाख ५४ हजार रुपैयाँ पुगेको छ। गत वर्षको सोही अवधिमा यस्तो आम्दानी ४ करोड ३२ लाख ९४ हजार रुपैयाँ रहेको थियो।

त्यस्तै, संस्थाको सञ्चालन मुनाफा २ करोड १२ लाख ६६ हजार रुपैयाँ पुगेको छ। अघिल्लो आर्थिक वर्षको सोही अवधिमा यस्तो मुनाफा २ करोड २ लाख ५० हजार रुपैयाँ रहेको थियो।

वित्तीय विवरणअनुसार संस्थाको कर्जा तथा सापटी प्रवाह बढेर २ अर्ब २९ करोड ९६ लाख रुपैयाँ पुगेको छ। गत आर्थिक वर्षको अन्त्यमा यस्तो कर्जा २ अर्ब २१ करोड ७१ लाख रुपैयाँ रहेको थियो।

संस्थाको निक्षेप संकलन पनि बढेको छ। समीक्षा अवधिमा निक्षेप ६८ करोड रुपैयाँ पुगेको छ। अघिल्लो आर्थिक वर्षको अन्त्यमा यस्तो निक्षेप ६३ करोड ८२ लाख रुपैयाँ रहेको थियो।

तर, संस्थाको खराब कर्जा (एनपीएल) अनुपातमा भने उल्लेख्य वृद्धि देखिएको छ। समीक्षा अवधिमा निष्क्रिय कर्जा अनुपात ६.८४ प्रतिशत पुगेको छ। गत आर्थिक वर्षको सोही अवधिमा यस्तो अनुपात ३.१३ प्रतिशत रहेको थियो। खराब कर्जामा भएको यो वृद्धिले संस्थाको कर्जा गुणस्तरमा दबाब बढेको संकेत गर्छ।

संस्थाको चुक्ता पुँजी १४ करोड ४९ लाख रुपैयाँ रहेको छ। जगेडा कोषमा ६ करोड ३४ लाख रुपैयाँ सञ्चित रहेको छ भने कुल इक्विटी २३ करोड ६३ लाख रुपैयाँ पुगेको छ।

संस्थाको प्रतिसेयर नेटवर्थ १५२ रुपैयाँ ५८ पैसा रहेको छ। यस्तै, मूल्य आम्दानी अनुपात (पीई रेसियो) ८.५८ गुणा रहेको छ।

संस्थाले समीक्षा अवधिसम्म २ करोड ७९ लाख रुपैयाँ वितरणयोग्य मुनाफा कायम गरेको छ। वार्षिकीकृत वितरणयोग्य प्रतिसेयर आम्दानी ४० रुपैयाँ २१ पैसा रहेको वित्तीय विवरणमा उल्लेख छ।