आईफोनका प्रयोगकर्ता हैरान,आईओएस अपडेट गर्दा १४ वर्ष अघि डिलिट भएको फोटो रिकभर

FIN-TECH
आईतवार, जेष्ठ ६,२०८१ 16:50:04

काठमाण्डौ । लेटेस्ट सफ्टवेयर अपडेट गरेपछि स्मार्ट मोबाइल प्रयोगकर्ताहरुले कयौँ समस्याहरुको सामना गर्नुपर्ने हुनसक्छ । अहिले यस्तै समस्या आईफोनको आईओएस १७.५ अपडेटमा पनि देखिएको छ । आईफोन प्रयोगकर्ताले लेटेस्ट अपडेटपश्चात उनीहरुको डिलिट भएको पुरानो फोटोहरु पुनःफिर्ता आएको बताएका छन् । प्रयोगकर्ताहरुले वर्षो पहिले डिलिट भएका फोटोहरु आफै रिकभर भईरहेको जनाइएको छ ।

यसभन्दा पनि नराम्रो त के भने कसैले यस्ता फोटो पुनःडिलिट गर्दा पनि फेरि रिकभर भईरहेको छ । नयाँ फिचर्स तथा इम्प्रुभ्मेन्टका साथ आउने सफ्टवेयर अपडेट्स कयौँपटक समस्या बनिदिन सक्छन् ।

एक जना प्रयोगकर्ताले आईफोनको यो समस्याका बारेमा रेड्डिटमा पोस्ट गरेपछि यो समस्या चर्चामा आएको हो । ती प्रयोगकर्ताले सन् २०२१ मा डिलिट गरेको फोटो आईओएस १७.५ अपडेट गरेपछि रिकभर भएको बताएका छन् । यस्तो फोटो एउटा ट्याग–‘रिसेन्टली अपलोडेड टु् आईक्लायड’ का साथ फिर्ता आईरहेका छन् ।

यस्तै समस्या अन्य आईफोन प्रयोगकर्ताहरुले समेत सामना गरेका छन् । एक जना प्रयोगकर्ताले त सन् २०१० मा डिलिट गरेको फोटो समेत रिकभर भईरहेका बताएका छन् । यी समस्याले प्रयोगकर्ताहरु हैरान भएको गुनासो गरिरहेका छन् । यो समस्याले एप्पलले कति समयससम्म प्रयोगकर्ताहरुको डेटा राख्छ भन्ने मुख्य चासोको विषय बनेको बताएका छन् ।

एप्पल सपोर्टका अनुसार प्रयोगकर्ताको डिलिट भएको फोटो रिसेन्ट्ली डिलिटेड एल्बममा ३० दिनसम्म रहने गर्छ । ३० दिनपछि यी फोटोलाई डिभाइसबाट हटाइन्छ । यदि यस्तो फोटोलाई रिसेन्ट्ली डिलिटेड एल्बमबाट म्यानुअल्ली डिलिट गरियो भने त्यो फोटो सदाका लागि डिलिट हुन्छ ।

आइफोनका प्रयोगकर्ताले आईओएस सिस्टमले यस्ता डिलिट भएका फोटोलाई आईओएसले पुनःखोजिरहेको आरोप लगाएका छन् । -एजेन्सी