.gif)
.gif)
.jpg)
.png)
काठमाण्डौ । हिमालयन रि इन्स्योरेन्सको सेयरभाउ हालसम्मकै उच्च विन्दुमा पुगेको छ । प्रिमियम मूल्यमा आईपीओ ल्याएको सो कम्पनीको सेयर धितोपत्र दोस्रो बजारमा निकै चर्चामा रहेको छ ।
कम्पनीको सेयर २०८० पुष २२ गते नेपाल स्टक एक्सचेञ्ज (नेप्से)मा सूचीकृत भएको थियो । कम्पनीको कुल १० करोड कित्ता सूचीकृत भएको थियो । तर कम्पनीले आर्थिक वर्ष २०७९/८० का लागि ४ प्रतिशत बोनस सेयर वितरण गरेका कारण हाल कम्पनीको १० करोड ४० लाख कित्ता सेयर सूचीकृत रहेको छ ।
नेप्सेमा सूचीकृत कम्पनीहरुमा हिमालयन रि इन्स्योरेन्स ठूलो पुँजी भएको कम्पनीमा पर्छ । कम्पनीको धितोपत्र बजार पूँजीकरण ८० अर्ब ८ करोड रुपैयाँ रहेको छ । यसर्थ बजारमा ‘हाई क्याप’ भएको कम्पनीमा हिमालयन रि इस्योरेन्स पनि गनिन्छ ।
(1).gif)
कम्पनीको अन्तिम सेयरभाउ ७७० रुपैयाँ रहेको छ, जुन यो हालसम्मकै उच्च मूल्य हो । यसअघि कम्पनीको सेयरमूल्य साउन १७ गते ७४५ रुपैयाँ पुगेर बन्द भएको थियो । आज कम्पनीको सेयरभाउ ३.२३ प्रतिशत अर्थात् २४.१० रुपैयाँले बढेर ७७० रुपैयाँ पुगेको हो ।
सेयरभाउ बढेसँगै कम्पनीको सेयरमा लगानीकर्ताहरुको आकर्षण बढ्दो छ । दुईदिनयता हिमालयन रि इन्स्योरेन्सको सेयर सर्वाधिक कारोबार भएको छ । आज एकैदिन सो कम्पनीको ५९ करोड ७५ लाख रुपैयाँ बराबरको सेयर खरिदबिक्री भएको छ । एक सातामा यो कम्पनीको ३ अर्ब ६६ करोड रुपैयाँबराबरको सेयर कारोबार भएको छ । यसर्थ बढ्दो सेयरबजारमा हिमालयन रि इन्स्योरेन्सको सेयर पनि ‘हट केक’ बनेको छ ।
केही समयअघि सेयरबजारमा ‘लो क्याप’ भएका कम्पनी चलाउने प्रवृत्ति मौलाएको थियो । थोरै पूँजी भएका कम्पनीलाई उचालेर सेयरभाउ बढाउने खालका प्रपञ्च रचिन्थ्यो । तर मौद्रिक नीतिपश्चात् आक्रामक रुपमा बढ्न थालेको बजारमा ‘हाई क्याप’ भएका कम्पनीहरु पनि चल्न थालेका छन् ।
धितोपत्र बजार पूँजीकरणमा सर्वाधिक हिस्सा रहेको वाणिज्य बैंकहरुको सेयरभाउ साउन १३ गते आक्रामक रुपमा बृद्धि भएको थियो । अधिकांश बैंकका सेयरमा सो दिन सकारात्मक सर्किट लागेको थियो ।
यसरी नै ठूला पूँजी भएका कम्पनीमा हिमालयन रि इन्स्योरेन्स, नेपाल रि इन्स्योरेन्स, नेपाल टेलिकम, नागरिक लगानी कोष र केही वाणिज्य बैंकहरु पर्दछन् । बढ्दो बजारमा हाई क्याप भएका कम्पनीहरु झन चल्न थालेका छन् ।
पछिल्लो समय बजारमा हिमालयन रि इन्स्योरेन्सको सेयर चर्चामा छ । जति–जति सेयरमूल्य बढ्दै गयो उति नै कम्पनीको कारोबारमा समेत बृद्धि भएको देखिएको छ । सूचीकृतपश्चात कम्पनीको सेयर कारोबार ३०९.२० रुपैयाँमा खुलेको थियो । सोही दिन कम्पनीको सेयरभाउ बढेर ३२७.०८ रुपैयाँमा बन्द भएको थियो ।
लगातार ७ कारोबार दिनसम्म कम्पनीको सेयरभाउ बढेर ८औं कारोबार दिनमा कम्पनीको सेयरभाउ घटेको थियो । यसरी नै सेयरभाउमा उतारचढाव हुँदै जाँदा कम्पनीको सेयरभाउ माघ १६ गते प्रतिकित्ता ६८२.५९ रुपैयाँ पुगेको थियो ।
त्यसपछि आव २०८१/८२ को मौद्रिक नीति सार्वजनिक भएपछि बढेको सेयरबजारमा हिमालयन रि इन्स्योरेन्सको सेयरभाउ ७ सय रुपैयाँ नाघेको हो । ‘बुलिस ट्रेन्ड’मा चलेको सेयरबजारमा हिमालयन रि इन्स्योरेन्सको सेयरभाउले दिनहुँ नयाँ रेकर्ड कायम गर्दै आएको छ ।
सेयरबजारमा एकाएक आक्रामक सुधार देखिँदा लगानीकर्ताहरु उत्साहित बनेका छन् । बजारमा नयाँ लगानीकर्ताहरु प्रवेश गर्दा नयाँ रकम भित्रिएको छ । सेक्टरवाइज सबै कम्पनीहरु अहिलेको समयमा चल्ने बजार जानकारहरुको भनाई छ । ‘बुलिस ट्रेन्ड’मा चलेको सेयरबजारमा हिमालयन रि जस्ता हाई क्याप भएका कम्पनीहरु बढी चल्ने बजार जानकारहरु बताउँछन् ।
कम्पनीले १०० रुपैयाँ प्रतिकित्ता अंकित मूल्यमा १०६ रुपैयाँ प्रिमियम थप गरेर २०६ रुपैयाँमा आईपीओ निष्कासन गरेको थियो । ८ महिनाको अन्तरालमा हिमालयन रि इन्स्योरेन्सका सेयरधनीहरुले १५१.६३ प्रतिशतसम्म नाफा बुक गर्न सफल भएका छन् ।
.png)
.png)
.jpg)
.jpg)
(1).gif)
.gif)
