सेयर बजारका बादशाह पनि बजार प्रवेश गरे, पहिलो दिन नै उठाए ३९ करोडको सेयर

काठमाण्डौ । नेपाली सेयर बजारको बादशाह भनेर चिनिने निर्मल प्रधान समेत थप लगानी लिएर बजार प्रवेश गरेका छन् ।  

बजार २२०० विन्दूबाट माथि उक्लिएर २८०० सम्म पुग्दा समेत उनी बजारमा थप लगानीसहित प्रवेश गरेका थिएनन् । आफूसँग भएका सेयरहरुलाई नै होल्ड गरी बसेका उनी आइतबार एकैपटक ३९ करोडको  सेयर किनेर बजार प्रवेश गरेका हुन् । 

'उहाँ लामो समयसम्म बुल मार्केट हो कि होइन भनेर दिविधासहित बस्नुभएको रहेछ । उहाँको छोराले अब चाहि बजार घट्दैन र अलटाईम हाईलाई ब्रेक गरेर समेत माथि जान्छ भनेर सम्झाएपछि हिजोबाट बजार प्रवेश गर्नुभएछ ।' उनले कारोबार गर्ने ब्रोकर निकट स्रोतले बिजशालासँग भन्यो -'हिजो उहाँले एउटा हाइडो र केही बैंकमा एकैपटक ३९ करोड लगानी गर्नुभएको छ ।'  

प्रधानलाई उद्धृत गर्दै स्रोतले बताएअनुसार उनी थप लगानी समेत हाल्ने तयारी गरिरहेका छन् ।  

बजार उछालको गतिमा अगाडि बढेपछि र कारोबार रकम पनि उसैगरी बढेपछि प्रधानजस्ता बिग प्लेयरहरु समेत ठूलो फण्डसहित बजार प्रवेश गरेका स्रोतहरुको दाबी छ ।  

संस्थागत लगानीकर्ताहरुले पनि दोश्रो बजारमा आक्रामक लगानी बढाएका छन् । यसले समेत कारोबारमा दैनिकजसो रेकर्ड बन्ने अवस्था बनिरहेको हो ।