नेशनल लाइफको नाफा र बीमाशुल्क आर्जनमा सामान्य वृद्धि, रिटेन्ट अर्निङ ५०% ले घट्यो

काठमाण्डौ । नेशनल लाइफ इन्स्योरेन्स कम्पनी लिमिटेडको नाफा र बीमाशुल्क आर्जनमा सामान्य वृद्धि भएको छ । कम्पनीले चालु आवको पहिलो त्रैमाससम्म १३ करोड ८३ लाख रुपैयाँ खुद नाफा आर्जन गरेको छ । यो रकम अघिल्लो आवमा कम्पनीले आर्जन गरेको १३ करोड २ लाख रुपैयाँको तुलनामा ६.२४ प्रतिशतले बढी हो ।  

कम्पनीको खुद बीमाशुल्क आर्जन पनि १८.१३ प्रतिशतले बढेर ४ अर्ब ८५ करोड रुपैयाँ पुगेको छ ।  

यो अवधिमा कम्पनीले ६ अर्ब ६९ करोड रुपैयाँ कुल आम्दानी गरेको छ । कम्पनीको खर्चमा केही बढोत्तरी आएको छ । अघिल्लो आवसम्म ५ अर्ब ३५ करोड रुपैयाँबराबरको कुल खर्च गरेको कम्पनीको खर्च बढेर ६ अर्ब ३० करोड रुपैयाँ पुगेको छ ।  

कम्पनीले सेयर प्रिमियम शीर्षकमा २ करोड ७८ लाख रुपैयाँको व्यवस्था गरेको छ । अघिल्लो आवसम्म १ अर्ब २२ करोड रुपैयाँ रहेको कम्पनीको रिटेन्ड अर्निङ घटेर ६१ करोड ३७ लाख रुपैयाँमा सीमित बनेको छ । जुन ५०.०३ प्रतिशतले कम हो । कम्पनीको महाविपत्ती कोषको आकार ५८ करोड ३६ लाख रुपैयाँ रहेको छ ।  

समीक्षा अवधिसम्म कम्पनीको प्रतिसेयर आम्दानी १०.६६ रुपैयाँ, प्रतिसेयर नेटवर्थ १३२.४५ र मूल्य आम्दानी अनुपात ५९.३६ गुणा कायम भएको छ ।